NATO bosh kotibi Yens Stoltenberg Germaniya va boshqa ittifoqchilarni Ukrainaga qurol yetkazib berishni davom ettirishga chaqirdi. Bu haqda Deutsche Welle xabar berdi.
“Bu paradoksal tuyulishi mumkin, ammo Ukrainani harbiy qo‘llab-quvvatlash tinchlikka erishishning eng tezkor yo‘lidir”, — dedi Stoltenberg.
Uning so‘zlariga ko‘ra, Rossiya prezidenti Vladimir Putin Ukraina ustidan nazorat o‘rnatolmasligini tushunishiga ishonch hosil qilish kerak.
“Bu Ukrainaning mustaqil demokratik davlat sifatida omon qolishini kafolatlaydigan tinchlik kelishuviga yo‘l ochadi”, — deya qo‘shimcha qildi u.
Shuningdek, Stoltenberg Ukrainaning Rossiyadagi harbiy nishonlarga uyushtirgan hujumlarini mutlaqo qonuniy deb bilishini ochiq aytdi. “Har bir davlat, jumladan, Ukraina ham o‘zini himoya qilishga haqli”, — dedi siyosatchi.
Uning tushuntirishicha, Ukraina hujumlarini tinch aholini qishda suv, issiqlik va elektr energiyasidan mahrum etishga qaratilgan Rossiyaning Ukraina fuqarolik infratuzilmalariga ommaviy zarbalari kontekstida ko‘rish kerak.
26-dekabr kuni Rossiyaning havo hujumiga qarshi mudofaa tizimlari Saratovdagi “Engels” harbiy aerodromiga yaqinlashib kelayotgan Ukraina dronini urib tushirdi. Dron qismlarining qulashi oqibatida uch nafar harbiy xizmatchi og‘ir tan jarohati oldi, uch kishi halok bo‘ldi. Aerodromdagi samolyotlarga zarar yetmagan.
Hodisa sababli Rossiya “Engels”dagi qiruvchi samolyotlarini boshqa joyga ko‘chirmoqchi, bu uning Ukrainaga raketa zarbalari berishini qiyinlashtirishi mumkin.
5-dekabr kuni Rossiya Mudofaa vazirligi Ukraina Saratov va Ryazan viloyatlaridagi harbiy aerodromlarga dron bilan hujum qilishga uringani, oqibatda uch harbiy halok bo‘lganini ma’lum qildi. Bunga javoban Rossiya Ukraina harbiy qo‘mondonlik va nazorat tizimi va tegishli mudofaa 17 ta obyektlariga kuchli zarba bergan.
Izoh (0)