НАТО бош котиби Йенс Столтенберг Германия ва бошқа иттифоқчиларни Украинага қурол етказиб беришни давом эттиришга чақирди. Бу ҳақда Deutsche Welle хабар берди.
«Бу парадоксал туюлиши мумкин, аммо Украинани ҳарбий қўллаб-қувватлаш тинчликка эришишнинг энг тезкор йўлидир», — деди Столтенберг.
Унинг сўзларига кўра, Россия президенти Владимир Путин Украина устидан назорат ўрнатолмаслигини тушунишига ишонч ҳосил қилиш керак.
«Бу Украинанинг мустақил демократик давлат сифатида омон қолишини кафолатлайдиган тинчлик келишувига йўл очади», — дея қўшимча қилди у.
Шунингдек, Столтенберг Украинанинг Россиядаги ҳарбий нишонларга уюштирган ҳужумларини мутлақо қонуний деб билишини очиқ айтди. «Ҳар бир давлат, жумладан, Украина ҳам ўзини ҳимоя қилишга ҳақли», — деди сиёсатчи.
Унинг тушунтиришича, Украина ҳужумларини тинч аҳолини қишда сув, иссиқлик ва электр энергиясидан маҳрум этишга қаратилган Россиянинг Украина фуқаролик инфратузилмаларига оммавий зарбалари контекстида кўриш керак.
26 декабрь куни Россиянинг ҳаво ҳужумига қарши мудофаа тизимлари Саратовдаги «Энгельс» ҳарбий аэродромига яқинлашиб келаётган Украина дронини уриб туширди. Дрон қисмларининг қулаши оқибатида уч нафар ҳарбий хизматчи оғир тан жароҳати олди, уч киши ҳалок бўлди. Аэродромдаги самолётларга зарар етмаган.
Ҳодиса сабабли Россия «Энгельс»даги қирувчи самолётларини бошқа жойга кўчирмоқчи, бу унинг Украинага ракета зарбалари беришини қийинлаштириши мумкин.
5 декабрь куни Россия Мудофаа вазирлиги Украина Саратов ва Рязань вилоятларидаги ҳарбий аэродромларга дрон билан ҳужум қилишга урингани, оқибатда уч ҳарбий ҳалок бўлганини маълум қилди. Бунга жавобан Россия Украина ҳарбий қўмондонлик ва назорат тизими ва тегишли мудофаа 17 та объектларига кучли зарба берган.
Изоҳ (0)