AQSH Senati 2023-yil uchun 858 mlrd dollarlik mudofaa budjetini tasdiqladi — bu rekord summa

AQSH Kongressi Senati (yuqori palatasi) 2023-moliya yili uchun rekord darajada — 858 milliard dollarlik mudofaa budjeti loyihasini  ma’qulladi, deb xabar bermoqda Reuters.

Avvalroq loyiha Kongressning ikkala palatasida Qurolli kuchlar ishlari bo‘yicha qo‘mitalar hamda Vakillar palatasi (quyi palata) tomonidan ma’qullangan edi. Endi hujjat AQSH prezidenti Jo Baydenga imzolash uchun yuboriladi.

858 milliard dollarlik loyiha quyidagilardan iborat bo‘ladi:

• 317,3 milliard dollar — ekspluatatsiya va texnik xizmat ko‘rsatish (shu jumladan, aylanma mablag‘lar);
• 174,5 milliard dollar — harbiy xizmatchilarni maosh bilan ta’minlash uchun;161,3 milliard dollar — harbiy xaridlar uchun;138,6 milliard dollar — tadqiqot va ishlanmalar uchun;30,5 milliard dollar — Atom energetikasi faoliyati uchun;16,5 milliard dollar — harbiy qurilish va oilaviy uy-joy uchun.

Loyiha, xususan, Rossiyani Yevropada “tiyib turish” uchun 6 milliard dollar ajratish, Ukrainaga yordam berish uchun qo‘shimcha 800 million dollar ajratish, AQSHning Rossiya bilan harbiy sohada hamkorligini taqiqlash muddatini besh yilga uzaytirish, shuningdek, Rossiyani xalqaro tashkilotlar, shu jumladan G20 a’zoligidan chiqarib tashlashni talab qiluvchi buyruqlarni o‘z ichiga oladi.

Ma’lumot uchun, 2022-yilda AQSH mudofaa budjeti 770 milliard dollarni, 2021-yilda 740,5 milliard dollarni, 2020-yilda 740 milliard dollarni, 2019-yilda 738 milliard dollarni tashkil etgan.