Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
«Турли хил ғоялар ва ‘тинчлик формулалариъни илгари суриш орқали Зеленский Ғарбнинг ёрдами билан қўшинларимизнинг Донбасс, Қрим, Запорожье ва Херсон каби Россия ҳудудларидан олиб кетилишига, Россия томонидан товон тўланишига ва бошқа нарсаларга умидвор бўлмоқда. Албатта, биз бундай шартларда ҳеч ким билан музокара олиб бормаймиз», — дея хулоса қилди ТИВ раҳбари «РИА Новости»га берган интервьюсида.
Сергей Лавров, шунингдек, Владимир Зеленскийни февралда бошланган Россия-Украина музокаралар жараёнини «англосакслар буйруғи билан» тўхтатиб қўйишда айблади. Шу билан бирга, дипломат таъкидлашича, бир неча раунд давом этган музокаралар «ўзаро мақбул келишувлар»га эришиш мумкинлигини кўрсатганди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Кейинроқ Зеленскийнинг жамоаси тинчликка эришиш бўйича режа тафсилотларини ишлаб чиқаётгани маълум бўлди. Таклифларни тахминан Украинада уруш бошланганига бир йил тўладиган санада, 24 февраль куни тақдим этиш кўзда тутилмоқда.
Изоҳ (0)