Rossiya 29-dekabr kuni Ukrainaga 120 dan ortiq raketa uchirdi. Bu haqda Prezident devoni rahbari maslahatchisi Mixail Podolyak Twitter’da ma’lum qildi.
Podolyakning so‘zlariga ko‘ra, Moskvaning maqsadi mamlakatning muhim infratuzilmasini yo‘q qilish va tinch aholini qirg‘in qilishdir.
“29.12.22. Rossiya tomonidan muhim infratuzilmani va tinch aholini ommaviy yo‘q qilish uchun butun Ukraina bo‘ylab 120 dan ortiq raketalar uchirildi. Raketa zarbalaridan so‘ng ‘tinchlikparvarlar’dan mojaroni ‘tinchlik yo‘li bilan hal qilish’, ‘Rossiya uchun xavfsizlik kafolatlari’ va provokatsiya qilishni to‘xtatish bo‘yicha keyingi takliflarni kutamiz”, — dedi u.
Rossiya 29-dekabr kuni Ukrainaga navbatdagi yirik raketa hujumini amalga oshirdi. Zelenskiy ofisi maslahatchisi Aleksey Arestovich Rossiya 100 dan ortiq raketa uchirmoqchiligini aytdi. Odessa, Kiyev, Xarkov, Jitomir, Chernigov va Ukrainaning boshqa viloyatlarida portlashlar yuz berdi.
Bundan tashqari, urib tushirilgan raketaning parchasi oqibatida Kiyevda turar joy binosi yonib ketdi.
Voqea joyiga qutqaruvchilar jalb qilindi. Kiyev meri Vitaliy Klichkoning so‘zlariga ko‘ra, Kiyevdagi nishonlarga uchirilgan 16 ta raketaning barchasi Ukraina poytaxti ustidan urib tushirilgan. Shu bilan birga, Kiyevda kamida uch kishi, jumladan, 14 yoshli qiz raketa parchalari oqibatida jarohatlangan.
Kiyevliklarning qariyb 40 foizi elektr energiyasi ta’minotidan uzilgan. Odessa viloyati osmonida 21 ta raketa urib tushirilgan. Ukraina bosh vaziri Rossiya 29-dekabrdagi hujumda ikki hafta davomida tayyorlanganini qo‘shimcha qildi. U Ukraina havo hujumidan mudofaa kuchlari 69 ta raketadan 54 tasini urib tushirganini ta’kidladi.
Mavzuga doir: Rossiya Xersondagi kasalxonaning tug‘uruq bo‘limini o‘qqa tutdi — foto
Izoh (0)