29-dekabr kuni Rossiya harbiylari Ukrainaga yangi raketa zarbalarini berdi. Ertalab butun mamlakat hududida havo trevogasi e’lon qilindi.
“Janub” tezkor qo‘mondonligi xabar qilishicha, Qora dengizga ikkita suv usti raketa tashuvchi kemalari jangovar navbatchilikka chiqqan va 16 ta “Kalibr” qanotli raketalarini uchirishga tayyorlangan.
Ukraina OAVlari va Telegram-kanallari ma’lumotlariga ko‘ra, Kiyev, Chernigov, Odessa va Jitomir viloyatlarida havo hujumiga qarshi mudofaa tizimlari ishga tushgan.
Kiyev shahrida va viloyatida portlash ovozlari eshitilgan. Mahalliy pabliklar xabarlariga ko‘ra, Kiyev osmonida raketa urib tushirilgan. Shahar ma’muriyati havo hujumiga qarshi mudofaa tizimi ishga tushganini tasdiqladi va aholini sarosimaga tushmasdan, boshpanalarda saqlanishga chaqirdi.
Odessada va Sumi viloyatida ham bittadan raketa urib tushirilgan.
Ukraina prezidenti ofisi rahbari maslahatchisi Aleksey Arestovich da’vo qilishicha, Rossiya armiyasi 29-dekabr kuni 100 dan ortiq raketalar bilan bir necha marta hujum qilishni rejalashtirmoqda.
Oktabr oyi boshidan beri Rossiya Mudofaa vazirligi Ukrainaning harbiy va energetika infratuzilmasiga muntazam raketa zarbalari berib kelmoqda. Hujumlarda Rossiya Erondan sotib olgan dronlardan ham foydalanmoqda.
Rossiya harbiylari 27-dekabr kuni Xersondagi kasalxonaning tug‘ruq bo‘limini o‘qqa tutdi, 24-dekabr kuni esa ular Xersonda, jumladan, ikkita tibbiyot muassasasiga zarba bergandi.
Ukraina ichki ishlar vaziri o‘rinbosari Yevgeniy Yenin ma’lum qilishicha, Rossiya zarbalari oqibatida mamlakatda fevraldan buyon jami 35 mingta obyekt zarar ko‘rgan, shularning 702 tasi muhim infratuzilma obyektlaridir.
Izoh (0)