O‘zbekistonda 2022-yilning 1-dekabr holatiga ko‘ra, muomaladagi bank kartalari soni 33,5 million donaga yetgan. Bu haqda Markaziy bank ma’lum qildi.
Sentabr oyida kartalar soni yil boshidan beri eng ko‘p — 620 mingtaga keskin ko‘paygan edi. Oktabrda bu ko‘rsatkich 577 ming donani tashkil qilgandi. Yil boshidan beri 5,3 mln dona bank kartasi muomalaga kiritilgan. Noyabr oyida esa 1,1 mln dona bank kartalari muomalaga kiritilgan.
Yil boshidan beri banklar va to‘lov tashkilotlari tomonidan o‘rnatilgan bankomat va infokiosklar soni 20,3 mingtani tashkil etgan.
Muomalaga kartalar chiqarish bo‘yicha banklar orasida 6,9 mln dona karta bilan “Xalq banki” yetakchilik qilmoqda.
Ikkinchi o‘rinni 3,9 mln bank kartasi bilan “Agrobank” egallagan bo‘lsa, 3,1 mln ko‘rsatkich bilan “Ipoteka bank” uchinchi bo‘ldi.
O‘rnatilgan bankomat va infokiosklar soni bo‘yicha “Xalq banki” “Kapitalbank” va “Agrobank”ni ortda qoldirib birinchi o‘ringa chiqib oldi. Noyabr oyida “Xalq banki” tomonidan 325 dona bankomat va infokiosklar ishga tushirildi va ularning umumiy soni 2 204 taga yetdi.
Mazkur ko‘rsatkich bo‘yicha ikkinchi o‘rinda “Agrobank”, uchinchi o‘rinda “Kapitalbank” bormoqda — mos ravishda 2 107 ta va 2 100 ta.
Avvalroq O‘zbekiston banklari o‘n bir oyda qariyb 9 trln so‘mlik sof foydaga erishgani haqida xabar berilgan edi.
Izoh (0)