Марказий банк бошқарувининг навбатдаги йиғилишида Банк назорати қўмитасининг 2022 йилги фаолияти таҳлил қилинди.
Қайд этилишича, қўмита томонидан жорий йил давомида 88 та йиғилиш ўтказилган бўлиб, уларда рухсат бериш тартиботи билан боғлиқ 218 та ва кредит ташкилотларининг молиявий ҳолатига доир 82 та масала ўрганиб чиқилган.
Бундан ташқари, нормативларга риоя этилмагани, молиявий йўқотишларга қарши захиралар яратилмагани, молиявий ҳолати тўловга қобилиятсиз бўлганлиги, ҳисобот маълумотларини бузиб кўрсатиш орқали Марказий банкка ҳаққоний бўлмаган маълумотлар тақдим қилиб келинганлиги сабабли, «Туркистонбанк» ва Hi-Tech Bank’лардан банк фаолиятини амалга ошириш ҳуқуқини берувчи лицензия чақириб олинди.
Қонунчиликда белгиланган муддатларда ўз фаолиятини бошламагани учун 3 та («International Eco Pay», «Panda internet technology», «Ugnis») тўлов ташкилотларидан ҳам лицензиялар чақириб олинган.
Таъкидланишича, қўмита бундан кейин ҳам банк тизими барқарорлигини сақлаб туриш, омонатчилар ва кредиторлар манфаатлари ҳимоя қилинишини таъминлаш билан бирга, халқаро стандартларга мувофиқ банк тизимини тартибга солиш ва назорат қилишнинг ҳуқуқий асосларини янада такомиллаштириш каби масалаларга эътибор қаратади.
Изоҳ (0)