AQSH Davlat departamenti Tayvanga 180 million dollarlik M136 Volcano tankka qarshi masofaviy tizimlarni sotishni ma’qulladi. Bu haqda Harbiy-siyosiy masalalar bo‘yicha boshqarmaning Twitter sahifasida xabar qilindi.
“Davlat departamenti Tayvanga 180 million dollarlik Volcano tankka qarshi tizimlarini sotish bo‘yicha so‘rovni ma’qulladi”, — deyiladi departament bayonotida.
Pentagonning xavfsizlik sohasida hamkorlik agentligi bayonotida aytilishicha, qurollarning Tayvanga sotilishi qonunga muvofiq va Vashingtonning milliy xavfsizlik manfaatlariga mos keladi.
“Taklif etilayotgan sotuv xarid qiluvchining xavfsizligini oshirishga yordam beradi, shuningdek, mintaqada siyosiy barqarorlik, harbiy muvozanat va iqtisodiy taraqqiyotni saqlashga ko‘maklashadi”, — deyiladi bayonotda.
AQSH hukumati bu qaror haqida Kongressni rasman xabardor qilgan. Agar kelishuv tasdiqlansa, Northrop Grumman va Oshkosh korporatsiyasi asosiy pudratchilar bo‘ladi.
Avvalroq Xitoy AQSH prezidenti Jo Bayden tomonidan imzolangan AQSHning 2023-yilgi mudofaa budjetini tanqid qilgandi. Xitoy rasmiylarining aytishicha, hujjatdagi Tayvanga nisbatan “yagona Xitoy” tamoyilini buzuvchi qoidalar ularning noroziligiga sabab bo‘lgan.
Izoh (0)