Shoygu Rossiyada qisman safarbarlik paytida ko‘plab muammolar bo‘lganini tan oldi (video)

Rossiyada qisman safarbarlik paytida ko‘plab muammolar bo‘lgan, shunga qaramay, jarayon yakunlangan. Bu haqda Rossiya mudofaa vaziri Sergey Shoygu Ukrainadagi “maxsus harbiy operatsiya” bo‘yicha muvofiqlashtiruvchi guruhning birinchi yig‘ilishida aytib o‘tdi.

“Bilasiz, qisman safarbarlikni yakunlaganmiz, biz uni amalga oshirdik, ko‘p qiyinchilik va muammolar bo‘ldi”, — dedi Shoygu.

Vazirning so‘zlariga ko‘ra, safarbarlik bilan bog‘liq aksar muammo va masalalar tezda hal etilgan. Shoygu Mudofaa vazirligi fuqarolardan hech qanday ma’lumotni yashirmaslikka harakat qilganini ta’kidladi.

“Muammo bor, uni hal qilish kerak. Buning uchun men ko‘pchilikka rahmat aytaman”, — dedi Shoygu.

21-dekabr kuni Rossiya prezidenti Vladimir Putin qisman safarbarlik sharoitida harbiy ro‘yxatga olish va qabul qilish bo‘limlari tizimini modernizatsiya qilishni buyurdi. Davlat rahbari Rossiyadagi safarbarlik chog‘ida muayyan muammolar aniqlanganini ta’kidladi. Bundan tashqari, Putin bo‘linmalarni joylashtirish uchun qurol va moddiy resurslarni to‘plash va saqlash tizimini takomillashtirish muhimligini ta’kidladi.

Rossiyada qisman safarbarlik 21-sentabr kuni e’lon qilingandi. 28-oktabr kuni mudofaa vaziri Sergey Shoygu safarbarlik yakunlangani va berilgan barcha topshiriqlar bajarilgani haqida hisobot berdi. Shu bilan birga Putin safarbarlik yakunlangani haqida rasmiy hujjat imzolamagan.