Fransiyaning Ozarbayjondagi elchisi Ann Boyon mamlakat Tashqi ishlar vazirligiga chaqirildi va unga norozilik notasi topshirildi, deb yozadi “Kommersant”.
28-dekabr kuni Fransiya parlamenti vakillari prezident Emmanuel Makronga xat yuborib, Armaniston-Ozarbayjon nizosiga aralashishni so‘ragan, chunki Ozarbayjon gumanitar halokat yuzaga kelishi uchun xavf yaratganini aytgandi. Boku Parijning ayblovlarini tuhmat va asossiz deb atadi.
Ozarbayjon TIV Fransiya parlamenti maktubini mamlakatga qarshi qaratilgan chora-tadbirlarning davomi deb baholandi.
Fransiyalik siyosatchilarning qo‘shma maktubida aytilishicha, Ozarbayjonning xatti-harakatlariga qaraganda, nizo keskinlashishda davom etadi va gumanitar halokatga olib keladi. Mansabdorlar fikricha, Boku harbiy jinoyatlarni amalga oshirishda, madaniy merosni yo‘q qilishda va kelishuvlarni buzadigan boshqa harakatlarni amalga oshirishda davom etadi. Shu munosabat bilan Fransiya Ozarbayjonni qoralashi va Armanistonga yordam ko‘rsatishi kerakligi aytiladi.
24-dekabr kuni Emmanuel Makron Ozarbayjon prezidenti Ilhom Aliyevni 2020-yil 9-noyabrda imzolangan o‘t ochishni to‘xtatish haqidagi bitimga rioya qilishga hamda Armaniston va Tog‘li Qorabog‘ni bog‘lovchi yagona yo‘l — Lochin yo‘lagi bo‘ylab harakatlanishga ruxsat berishga chaqirgandi. Ushbu yo‘nalish 12-dekabr kuni ozarbayjonliklar guruhi tomonidan to‘sib qo‘yilgan. Aliyev bunga javoban Boku yo‘lakni fuqarolar va gumanitar ehtiyojlar uchun yopib qo‘ymaganini aytdi.
Izoh (0)