Janubiy Koreya Qurolli kuchlari qo‘mondonligi KXDR uchuvchisiz uchar qurilmalari mamlakat prezidenti ofisi joylashgan hududga yaqinlashgani haqidagi xabarlarni rad etdi, deb yozadi Yonhap.
Avvalroq muxolifatchi “Toburo” demokratik partiyasi deputati Kim Byon Chju Shimoliy Koreya droni Seulda Janubiy Koreya prezidenti Yun Sok Yolning ofisidan taxminan 3,7 km masofada joylashgan parvoz taqiqlangan P-73 zonasiga bostirib kirganini ma’lum qilgandi.
“Bu mutlaqo haqiqatga to‘g‘ri kelmaydi, — dedi Koreya Respublikasi Shtab boshliqlari qo‘mitasi vakili Li Son Chon. — Bunday noto‘g‘ri va asossiz bayonotlar berilayotganidan juda afsusdamiz”.
26-dekabr kuni Kengido provinsiyasining chegara hududida KXDRning beshta droni aniqlangan, shundan keyin Janubiy Koreya ogohlantiruvchi xabarlar tarqatgan, qiruvchilar, vertolyotlar va havo hujumiga qarshi mudofaa vositalari trevoga bo‘yicha havoga ko‘tarildi. Respublika o‘z uchuvchisiz uchar qurilmalarini chegara yaqinidagi tumanlarga yo‘naltirdi.
Janubiy Koreya harbiylari KXDR dronlarini urib tushirish uchun qariyb yuz marta o‘t ochdi. Eni 2 metrdan ortiq bo‘lmagan dronlarni bunday o‘qlar bilan urib tushira olishmagan. Beshta drondan bittasi Seul osmonidan uchib o‘tgan, qolganlari Janubiy Koreya g‘arbidagi Kanxvado oroli yaqiniga borgan. U demarkatsiya chizig‘i yaqinida, Seul esa undan taxminan 50 km narida joylashgan. Keyinroq uchar qurilmalar Janubiy Koreya harbiylari monitoring zonasidan g‘oyib bo‘lgan.
Shundan so‘ng Janubiy Koreya harbiylari Shimoliy Koreya dronlarini yo‘q qilish bo‘yicha operatsiya muvaffaqiyatsiz o‘tgani uchun omma oldida uzr so‘radi.
Janubiy Koreya prezidenti Yun Sok Yol esa Shimoliy Koreyadan kelgan dronlarning har biriga KXDR bilan chegara orqali ikki yoki uchta uchuvchisiz uchoq yuborish bilan javob qaytarishni buyurdi.
Izoh (0)