Birlashgan Millatlar Tashkiloti bosh kotibi Antoniu Guterrish Ukraina bo‘yicha muzokaralarda vositachi bo‘lishi mumkin. Faqat buning uchun mojaro tomonlari rozi bo‘lishi kerak, deb xabar berdi “TASS” BMT rahbarining ofisiga tayanib.
“Bosh kotib ilgari ham bir necha bor ta’kidlaganidek, u vositachi bo‘lishi mumkin, faqat barcha tomonlar uning vositachilik qilishni xohlasagina ”, — deyiladi bayonotda.
Avvalroq Ukraina tashqi ishlar vaziri Dmitriy Kuleba Kiyev 2023-yil fevralida Guterrish vositachiligida BMTda tinchlik sammiti o‘tkazmoqchi ekanini aytgandi. Kulebaning so‘zlariga ko‘ra, bunday sammitni o‘tkazish uchun BMT eng yaxshi platforma bo‘lishi mumkin, chunki bu ma’lum bir davlatga xizmat ko‘rsatishni anglatmaydi. Bundan tashqari, BMT Bosh kotibining o‘zi ham o‘zini “samarali vositachi va muzokarachi” sifatida ko‘rsatgan.
Ayni vaqtda AQSH va Yevropa davlatlari Guterrishni “Rossiya tahdidlariga ochiqdan ochiq yon berishda” va Rossiyaning Ukrainaga hujum uchun chindan ham Eron dronlaridan foydalanayotganini tekshirish bo‘yicha missiya jo‘natmaganlikda ayblagan.
Buyuk Britaniya, Fransiya, Germaniya, AQSH va Ukraina Eronda ishlab chiqarilgan uchuvchisiz uchoqlarning Rossiyaga yetkazib berilishi BMT Xavfsizlik Kengashining 2015-yilda qabul qilingan rezolyutsiyasini (u Eron bilan yadroviy kelishuvni ta’minlashga qaratilgan) buzish ekanini da’vo qilmoqda. Ular Guterrishning Kiyevga tekshiruv uchun rasmiylardan iborat guruh yuborishini istamoqda.
Izoh (0)