Gen terapiyasi sohasidagi ba’zi yangi dorilar yaratuvchilari kasallikni bitta kurs mobaynida davolab berishni va’da qilmoqda, ayni vaqtda esa bunday dorilar narxi “tibbiy sug‘urta tizimi uchun sinovga aylanmoqda”, deb yozadi The Wall Street Journal.
Gazeta qayd etishicha, “qimmatbaho dorilar davri” kelmoqda. Avgustdan buyon AQSH va Yevropa regulyatorlari noyob irsiy kasalliklarni davolash uchun mo‘ljallangan to‘rtta preparatni ma’qulladi. Ularni bir marta qabul qilish kerak, biroq bitta dozaning qiymati kamida 2 million dollarga teng.
Misol sifatida WSJ B gemofiliyasiga qarshi Hemgenix dorisini keltirib o‘tdi. Niderlandiyaning UniQure kompaniyasi tomonidan ishlab chiqilgan ushbu dori Oziq-ovqat mahsulotlari va dori-darmonlar sifati ustidan sanitar nazorat bo‘yicha boshqarma (FDA) tomonidan noyabrda ma’qullangan. Dorining narxi 3,5 million dollar bo‘lib, u hozirgi paytda dunyodagi eng qimmatbaho preparat hisoblanadi.
Bluebird Skysona kompaniyasining bolalarni shikastlaydigan noyob nevrologik kasallikni davolaydigan dorisi 3 million dollar, beta-talassemiya (irsiy qon kasalligi) uchun dorisi esa 2,8 million dollar turadi. Novartis kompaniyasining orqa mushak atrofiyasini davolash uchun qo‘llaniladigan Zolgensma preparati narxi 2,1 million dollarga teng.
Qimmatbaho dorilar ishlab chiqaruvchilari bunday narx o‘zini oqlashini, chunki dorilarni bir marta qabul qilish yetarli bo‘lishini aytmoqda. Ularning fikricha, gen terapiyasi noyob irsiy kasalliklarga chalingan bemorlar uchun vaziyatni yaxshi tomonga o‘zgartira olishi mumkin. Biroq bunday muolajaga hamma bemorlarning ham qurbi yetmaydi, tibbiy sug‘urta kompaniyalari ham bunday katta to‘lovlarga tayyor emasligini aytmoqda. Ularning qayd etishicha, yanada qimmatroq gen terapiyalarining qo‘llanilishi sog‘liqni saqlash sohasiga xarajatlarni oshiradi.
McKinsey & Co. hisob-kitoblariga ko‘ra, 2024-yilda genterapiyasining 30 ga yaqin yangi usullari joriy etilishi mumkin.
Izoh (0)