Жанубий Корея ҳарбийлари икки мамлакат ўртасидаги ҳарбий чегара чизиғини кесиб ўтган Шимолий Корея дронларини йўқ қилиш бўйича операция муваффақиятсиз ўтгани учун омма олдида узр сўради. Бу ҳақда Бирлашган қўмитанинг операцион директори Кан Син Чхёлнинг баёнотига асосланиб, Yonhap агентлиги хабар берди.
«Гарчи ҳарбийларимиз дронларни топиб, кузатиб борган бўлса-да, уларни уриб тушира олмаганимиздан афсусдамиз», — деди у ва ҳарбийларнинг Шимолий Корея дронлари таҳдидига етарлича тайёргарлик кўрмаганини тан олди.
«Армия дронларга қарши кураш учун зарба берувчи воситаларни сафарбар қилади, ҳарбийлар КХДРнинг муҳим ҳарбий объектлар ортидан разведка ишларини олиб борадиган дронлар бўлинмасини тезроқ яратиш ташаббуси билан чиқади», — деб ваъда берди Кан Син Чхёл.
26 декабрь куни Кенгидо провинциясининг чегара ҳудудида КХДРнинг бешта дрони аниқланган, шундан кейин Жанубий Корея огоҳлантирувчи хабарлар тарқатган, қирувчилар, вертолётлар ва ҳаво ҳужумига қарши мудофаа воситалари тревога бўйича ҳавога кўтарилди. Республика ўз учувчисиз учар қурилмаларини чегара яқинидаги туманларга йўналтирди.
Жанубий Корея ҳарбийлари КХДР дронларини уриб тушириш учун қарийб юз марта ўт очди. Эни 2 метрдан ортиқ бўлмаган дронларни бундай ўқлар билан уриб тушира олишмаган. Бешта дрондан биттаси Сеул осмонидан учиб ўтган, қолганлари Жанубий Корея ғарбидаги Канхвадо ороли яқинига борган. У демаркация чизиғи яқинида, Сеул эса ундан тахминан 50 км нарида жойлашган. Кейинроқ учар қурилмалар Жанубий Корея ҳарбийлари мониторинг зонасидан ғойиб бўлган.
Yonhap қайд этишича, ушбу «ҳужум» беш йил ичидаги биринчи шундай воқеа бўлган.
Изоҳ (0)