Ҳиндистон Мудофаа вазирлиги Хитой ва Покистон чегараларига жойлаштириш учун 120 га яқин Pralay баллистик ракеталарини харид қилишни тасдиқлади. Бу ҳақда The Economic Times хабар берди.
Айни пайтда Pralay баллистик ракеталари 150 дан 500 километргача масофадаги нишонларга зарба беролади. Уни қарши томоннинг мудофаа тизимлари билан тутиб олиш жуда қийин.
«Мудофаа вазирлигининг юқори даражадаги йиғилишида қуролли кучлар учун 120 га яқин ракета сотиб олиш ва уларни чегаралар бўйлаб жойлаштириш масалалари аниқланди», дейилади хабарда.
Ракеталарни сотиб олиш ҳозирда баллистик ракеталардан тактик ролларда фойдаланишга рухсат берувчи сиёсатга эга бўлган мамлакат учун катта ривожланиш сифатида қаралмоқда. Хитойда ҳам, Покистонда ҳам тактик роллар учун мўлжалланган баллистик ракеталар мавжуд. Pralay ракетаси 2021 йилнинг 21 декабрь ва 22 декабрь кунлари кетма-кет икки марта муваффақиятли синовдан ўтказилган.
Pralay қаттиқ ёқилғи двигатель ва бошқа янги технологиялар билан жиҳозланган. Ракеталарни бошқариш тизими замонавий навигация ва интеграциялашган авионикани ўз ичига олади. Қурилма биринчи навбатда Ҳиндистон ҳаво кучлари томонидан қабул қилинади.
Мудофаа кузатувчилари фикрича, бундай ракета тизими душманнинг узоқ масофага учувчи ҳаво ҳужумидан мудофаа тизимларини, шунингдек, бошқа қуролларини йўқ қилиш учун ишлатилиши мумкин.
Ушбу ракеталарни жорий этиш таклифи мудофаа кучлари душман нишонларини узоқ масофадан уриб тушира оладиган махсус ракета кучларини яратиш устида иш олиб бораётган бир пайтда маъқулланган. Хитой армияси аллақачон махсус ракета кучларига эга.
Декабрь ойида Ҳиндистон Хитой билан чегарага «мисли кўрилмаган» даражада кўп ҳарбийларини жойлаштирган. Бу «2020 йилдан буён сезиларли даражада кўпайган» Хитой қўшинлари жойлаштирилишига қаршилик кўрсатиш учун қилинмоқда.
Изоҳ (0)