“2014—2016-yillar oralig‘ida samolyot to‘la bemorlar chet elga davolanish uchun ketardi” – mutaxassis

O‘zbekistonda 2014—2016-yillar oralig‘ida chet elga davolanish uchun ketish avjiga chiqqan. Bu haqda shifokor Maqsud Mallayev “Daryo”ga bergan intervyusida aytdi.

Maqsud Mallayevga ko‘ra, o‘sha davrda O‘zbekiston tibbiyotiga bo‘lgan ishonch nihoyatda past bo‘lgan.

“Eslayman, 2014—2016-yillar oralig‘ida hamyurtlarimiz chet elga davolanish uchun samolyot to‘la ketardi. Ba’zilar bizni tibbiyotga ishonmagani, boshqalari bizda chindan ham o‘sha operatsiyani qilish imkoni yo‘qligi uchun borardi. Har kuni kamida ikki samolyot bemorlar davolanish uchun Hindistonga ketardi. Imkoniyati ko‘proqlar Germaniyaga ketardi. Chunki xorijda tibbiyot sifati yuqoriligi aytilardi. Hozir chet el mutaxassislarini o‘zimizga olib kelib, operatsiya qildirish amaliyoti boshlangan. Ya’ni xorijga 100 kishi ketmayapti-da, u yoqdan bir shifokor kelib, shu yerning o‘zida 100 nafar bemorni operatsiya qilmoqda. Bunda yo‘lkira va chet eldagi klinikalarga sarflanadigan mablag‘lar o‘zimizda qolmoqda. Bu tibbiyotga ketayotgan xarajatlarni 70-80 foizga qisqartirib bermoqda. Qolaversa, o‘zimizning shifokorlar ham xorijliklardan bilim o‘rganib, ularning darajasiga chiqmoqda”, — dedi shifokor.

Avvalroq shifokor 2000-yillar tibbiyotini eslab, o‘sha davrda xususiy klinikalar ochish murakkab bo‘lganini aytgandi.

“2000-yillarda bitta xususiy klinikani ochish uchun byurokratizm va ko‘plab qiyinchiliklar bo‘lardi. Hozir xususiy klinika ochishda muammolar yo‘q. Qolaversa, bu yo‘nalishda davlat tomonidan subsidiyalar ham berilmoqda”, — degandi Maqsud Mallayev.