O‘zbekistonda hafta davomida qanday ob-havo bo‘lishi ma’lum qilindi

“O‘zgidromet” 26—30-dekabrga ob-havo prognozini e’lon qildi.

Unga ko‘ra, 26—27-dekabr kunlari O‘zbekiston hududining katta qismida yog‘ingarchilik kutilmaydi, Turkmaniston hududidan nam va iliq havo kirib kelishida faqat Buxoro, Navoiy, Samarqand, Qashqadaryo viloyatlarida ba’zi joylarda kuchsiz yomg‘ir yog‘adi, shimolda va cho‘l hududlarda biroz yog‘ingarchilik (yomg‘ir, qor) bo‘lishi mumkin.

Kunduzi havo harorati 7-12 daraja iliq bo‘ladi, ba’zi joylarda 15 darajagacha ko‘tariladi.

28-dekabrda nam havo massasi janubiy viloyatlardan respublikaning markaziy hududlariga siljiydi. Toshkent, Samarqand, Jizzax, Sirdaryo viloyatlarida ba’zi joylarda biroz yomg‘ir yog‘adi. Qolgan hududlarda yog‘ingarchilik kutilmaydi. Havo harorati kechasi 2 daraja sovuq — 3 daraja iliq, kunduzi 5-10 daraja iliq atrofida bo‘ladi.

29—30-dekabr kunlari respublika bo‘yicha yog‘ingarchilik bo‘lishi ehtimoli kam. Harorat kechasi 2 daraja sovuq — 3 daraja iliq atrofida bo‘ladi. Kunduzi harorat 2-7 daraja iliqqacha pasayadi.

Respublika bo‘yicha ba’zi joylarda tuman tushadi.

Ushbu haftada tog‘ oldi va tog‘li hududlarda vaqti-vaqti bilan yog‘ingarchilik (yomg‘ir, qor) bo‘ladi.

Mavzuga doir: Yangi yilda O‘zbekistonning aksar hududlarida qor yog‘ishi mumkin