Mutaxassislar fikri: global logistika ta’minoti 2024-yilgacha tiklanmaydi

CNBC telekanali AQSHdagi yirik kompaniyalarning logistika menejerlari o‘rtasida so‘rov o‘tkazdi. 

Unga ko‘ra, mutaxassislarning aksariyati global ta’minot zanjirlari 2024-yilgacha o‘z holiga qaytmaydi deb hisoblamoqda. 

Kanal AQSH Milliy chakana savdo federatsiyasi (NRF), Amerika kiyim-kechak va poyabzal ishlab chiqaruvchilari va savdogarlari assotsiatsiyasi va boshqa yirik professional uyushmalarga a’zo bo‘lgan AQSH kompaniyalarining 341 nafar menejeri bilan suhbat o‘tkazgan.

Logistika menejerlarining 61 foiziga ko‘ra, hozirgi vaqtda ularning ta’minot zanjirlari normal ish jarayoniga qaytmagan. 

Menejerlarning 32 foizi ta’minot zanjirlari allaqachon tiklanganini aytgan. Shu bilan birga, “ushbu zanjirlar qachon to‘liq tiklanishini kutyapsiz” degan savolga, menejerlarning 19 foizi 2023-yilda 30 foizi 2024-yilda deb javob bergan. 

Bundan tashqari 29 foiz respondentlarning fikriga ko‘ra, tiklanish 2025-yilgacha yoki umuman sodir bo‘lmaydi. 

Menejerlarning 59 foizi AQSH prezidenti Jo Bayden ma’muriyati ta’minot zanjirlari oldida turgan barcha qiyinchiliklardan xabardor emasligini ta’kidlagan. 

Logistika sohasidagi eng jiddiy muammolar qatorida menejerlar xomashyo taqchilligi, portlardagi tirbandliklar, malakali kadrlar yetishmasligi va mahsulot zaxiralarining o‘sishi tufayli saqlash joylari yetishmasligini ko‘rsatmoqda.