Yaponiyada narxlar oshishi 1991-yildan beri rekord darajaga yetdi

Yaponiyada noyabr oyida iste’mol narxlari o‘tgan yilning shu oyiga nisbatan 3,8 foizga oshdi. Bu haqda “Interfaks” xabar bermoqda. 

Mazkur ko‘rsatkich 1991-yil yanvar oyidan beri eng yuqorisi bo‘lib, narxlarning ko‘tarilishi ketma-ket 15 oy davomida qayd etildi. 

Noyabrda narxlar oshishi oktabr oyidagi 3,7 foizlik inflyatsiyaga nisbatan 0,1 foizga tezlashdi.

Yaponiya banki tomonidan nazorat qilinadigan asosiy ko‘rsatkich bo‘lgan yangi oziq-ovqat mahsulotlaridan tashqari iste’mol narxlari sentabr oyida 3,6 foizga o‘sganidan keyin o‘tgan oyda 3,7 foizga oshdi. 

O‘sish sur’ati 1981-yil dekabridan beri eng yuqori ko‘rsatkichdir. Shu bilan birga, bu ko‘rsatkich mamlakat markaziy bankining ketma-ket sakkizinchi oydagi 2 foizlik maqsadli ko‘rsatkichidan oshib ketdi.

Yaponiyada oziq-ovqat mahsulotlari 6,9 foizga, kiyim-kechak 2,7 foizga, yoqilg‘i, elektr energiyasi va suv ta’minoti 14,1 foizga, jumladan, elektr energiyasi 20,1 foizga va gaz 21 foizga qimmatlashgan. Transport va telekommunikatsiya xizmatlari narxi 1,6 foizga, ta’lim — 0,7 foizga oshgan.

Avvalroq O‘zbekistonda noyabr oyida 1,3 foizlik inflyatsiya qayd etilgani haqida xabar berilgan edi.