2021-yilda amerikaliklarning o‘rtacha umr ko‘rish davomiyligi 76,4 yoshni tashkil etdi. Bu 2020-yilga nisbatan 0,6 yilga kam va ketma-ket ikkinchi yilgi pasayish. Shu bilan birga, 2021-yil uchun bu ko‘rsatkich 1996-yildan beri eng past bo‘ldi. Ma’lumotlar AQSH Milliy sog‘liqni saqlash statistikasi markazi (NCHS) hisobotida keltirilgan.
Boshqarma hisobotida qayd etilishicha, erkaklar uchun o‘rtacha umr ko‘rish 2021-yilda 0,7 yoshga qisqarib, 73,5 yoshni, ayollarniki 0,6 yoshga qisqarib 79,3 yoshni tashkil etdi.
O‘tgan yili AQSH aholisining har 100 ming nafariga 879,7 o‘lim to‘g‘ri keldi, bu 2020-yilga nisbatan 5,3 foizga ko‘p.
Bir yil ichida mamlakatda 3,5 million o‘lim qayd etilgan, bu 2020-yilga nisbatan 80,5 ming kishiga ko‘pdir. Yurak kasalliklari (100 ming kishiga 173,8 ta o‘lim), saraton (146,6 ta holat) va COVID-19 (104,1 ta holat) o‘limning asosiy sabablaridan biri bo‘lib qolmoqda.
Bundan tashqari, dozani oshirib yuborishdan o‘limlar soni sezilarli darajada oshdi va rekord darajaga yetdi: 2021-yilda deyarli 107 ming amerikalik ushbu sababdan vafot etdi.
Hisobotni sharhlar ekan, NCHS statistika bo‘limi boshlig‘i Robert Anderson CNN’ga o‘lganlar soni asosan pandemiya bilan bog‘liqligini aytdi.
Shunday qilib, COVID-19 yurak kasalliklari sonining 3 foizga va insult sonining 6 foizga oshishiga olib kelgan.
Andersonning aytishicha, amerikaliklarning o‘rtacha umr ko‘rish davomiyligining qisqarishi kutilmagan narsa emas edi.
Uning so‘zlariga ko‘ra, manzara ijobiy tomonga o‘zgaradi va 2023-yil oxiriga kelib o‘rtacha umr ko‘rish pandemiyadan oldingi darajaga qaytishi mumkin.
Mutaxassislarning fikricha, COVID-19 pandemiyasi yillarida butun dunyoda umr ko‘rish davomiyligi qisqargan.
Agar 2019-yilda bu ko‘rsatkich 72,8 yil bo‘lgan bo‘lsa, 2020-yilda 72 yosh, 2021-yilda esa 71 yoshni tashkil etgan.
Izoh (0)