CNBC телеканали АҚШдаги йирик компанияларнинг логистика менежерлари ўртасида сўров ўтказди.
Унга кўра, мутахассисларнинг аксарияти глобал таъминот занжирлари 2024 йилгача ўз ҳолига қайтмайди деб ҳисобламоқда.
Канал АҚШ Миллий чакана савдо федерацияси (NRF), Америка кийим-кечак ва пойабзал ишлаб чиқарувчилари ва савдогарлари ассоциацияси ва бошқа йирик профессионал уюшмаларга аъзо бўлган АҚШ компанияларининг 341 нафар менежери билан суҳбат ўтказган.
Логистика менежерларининг 61 фоизига кўра, ҳозирги вақтда уларнинг таъминот занжирлари нормал иш жараёнига қайтмаган.
Менежерларнинг 32 фоизи таъминот занжирлари аллақачон тикланганини айтган. Шу билан бирга, «ушбу занжирлар қачон тўлиқ тикланишини кутяпсиз» деган саволга, менежерларнинг 19 фоизи 2023 йилда 30 фоизи 2024 йилда деб жавоб берган.
Бундан ташқари 29 фоиз респондентларнинг фикрига кўра, тикланиш 2025 йилгача ёки умуман содир бўлмайди.
Менежерларнинг 59 фоизи АҚШ президенти Жо Байден маъмурияти таъминот занжирлари олдида турган барча қийинчиликлардан хабардор эмаслигини таъкидлаган.
Логистика соҳасидаги энг жиддий муаммолар қаторида менежерлар хом ашё тақчиллиги, портлардаги тирбандликлар, малакали кадрлар етишмаслиги ва маҳсулот захираларининг ўсиши туфайли сақлаш жойлари етишмаслигини кўрсатмоқда.
Изоҳ (0)