O‘zbekiston banklari o‘n bir oyda qariyb 9 trln so‘mlik sof foydaga erishgan — Markaziy bank

O‘zbekiston banklari tomonidan joriy yilning yanvar—noyabr oylari davomida 86,7 trln so‘mlik daromad olingan. Bu haqda Markaziy bank xabar bermoqda.

Bunda foizsiz daromadlar 29,9 trln so‘mni, foizli daromadlar esa 56,8 trln so‘mni tashkil qilgan. 

O‘n bir oyda O‘zbekiston banklarining foizli va foizsiz xarajatlari mos ravishda 35,1 trln so‘m va 10,3 tlrn so‘m bo‘lgan. Shuningdek, banklar tomonidan 12,4 trln so‘mlik operatsion xarajatlar qilingan. 

Yil boshidan beri O‘zbekistondagi banklar 2,7 trln so‘mlik foyda solig‘ini to‘lagan. Bu o‘tgan yilga nisbatan 1,3 trln so‘mga ko‘p.

Banklar joriy yilda 8,8 trln so‘m sof foyda ko‘rgan. Ular tomonidan sentabr va oktabr oylarida 1 trln so‘mdan sof foydaga erishilgan edi. Bu ko‘rsatkich noyabr oyida 724 mlrd so‘mni tashkil qilgan. 

Yanvar—noyabr oylariga ko‘ra sof foyda miqdori o‘tgan yilning mos davriga nisbatan 3,2 trln so‘mga ko‘paygan.

Avvalroq O‘zbekistonda banklar ustav kapitalining eng kam miqdorini oshirish taklif qilinayotgani haqida xabar berilgan edi.