2022-yilning yanvar-noyabr oylariga ko‘ra O‘zbekistonning tashqi savdo aylanmasi 44,9 mlrd dollarni tashkil qildi. Bu haqda Davlat statistika qo‘mitasi xabar bermoqda.
Tashqi savdo aylanmasi 2021-yilning mos davriga nisbatan 6,8 mlrd dollarga ko‘paygan. Yil boshidan beri O‘zbekistonning tashqi savdodagi eng asosiy hamkorlari Rossiya va Xitoy bo‘lib turibdi — mos ravishda 8,3 mlrd va 8,2 mlrd dollar.
O‘zbekiston jahonning 200 mamlakati bilan savdo aloqalarini amalga oshirib kelmoqda.
Tashqi iqtisodiy faoliyat bo‘yicha 20 ta yirik hamkor-davlatlar orasidan uchta davlatda faol tashqi savdo balansi kuzatilgan. Bular Afg‘oniston, Qirg‘iz Respublikasi va Tojikistondir. Qolgan 17 ta davlatlar bilan passiv tashqi savdo balansi saqlanib qolmoqda.
Noyabr oyi O‘zbekiston uchun tashqi savdoda Rossiya va Ukraina o‘rtasidagi urush boshlanganidan beri eng faol oy bo‘ldi — 4,8 mlrd. Biroq bu ko‘rsatkich 2021-yilning mos davrida 5,3 mlrd dollar bo‘lgan edi.
O‘n bir oyda O‘zbekiston importi 27,6 mlrd dollarni, eksporti esa 17,4 mlrd dollarni tashkil qilgan.
Shuningdek eksport tarkibida tovarlar ulushi 79,2 foizni tashkil etib, ular sanoat tovarlari (23,1 foiz), oziq-ovqat mahsulotlari va tirik hayvonlar (8,4 foiz) va kimyoviy vositalar va shunga o‘xshash mahsulotlar (7 foiz) hissasiga to‘g‘ri kelmoqda.
2022-yil noyabr oyida import hajmi yil boshidan beri eng yuqori darajaga chiqib 2,3 mlrd dollarni tashkil etdi va 2021-yilning shu davriga nisbatan 29,8 foizga ko‘paydi.
O‘zbekiston yana oltin sota boshladi
Noyabrda O‘zbekiston yetti oydan beri birinchi marta 556,7 mln dollarlik oltin eksport qildi. Mamlakat so‘nggi bor mart oyida ushbu qimmatbaho metallni eksport qilgan edi.
O‘zbekistonning oltin eksportini to‘xtatib uni ko‘proq xarid qilishni boshlashiga jahondagi oltin narxlarining keskin pasayishi sabab bo‘lgan edi.
Global oltin narxlari mart oyida 2 050 dollar atrofida shakllangan edi. Biroq geosiyosiy vaziyat oqibatida narxlar yil davomida 1 650 dollardan ham tushib ketgan edi.
Bu holatda O‘zbekiston ko‘proq oltin sotib ola boshladi va qimmatbaho metallni xarid qilish bo‘yicha jahonda yetakchilardan biriga aylandi.
“Biz uchun ikkita omil bor: joriy narx va kelajakdagi narx. Narx ko‘tarilmoqdami yoki u o‘zining eng yuqori cho‘qqisiga yetib, pasayyaptimi? Bu biz izlayotgan daqiqa. Agar narx ko‘tarilayotgan bo‘lsa, kutganimiz ma’qul, — degan edi O‘zbekiston Markaziy banki raisi o‘rinbosari Behzod Hamroyev.
Noyabr oyiga kelib vaziyat birmuncha yaxshilandi va jahonda oltin narxlari 1 800 dollargacha ko‘tarildi. Ayni shu davrdan boshlab O‘zbekiston yana oltin sotishni boshlagan.
Izoh (0)