Ilon Mask joriy yilda 2021-yilda topgan boyligidan ko‘ra ko‘proq mablag‘ yo‘qotdi — Bloomberg

Tesla, SpaceX va Twitter kompaniyalari rahbari Ilon Mask 2022-yilda qariyb 122,6 milliard dollar yo‘qotdi. Bu haqda Bloomberg xabar berdi.

Bu yo‘qotish esa uning 2021-yilda topgan boyligidan ham ko‘p. Ma’lumotlarga ko‘ra, Ilon Mask aynan 2021-yilda eng ko‘p boylik orttirgan.

Ta’kidlanishicha, Maskning boyligi taxminan 147,7 milliard dollarni tashkil etadi. Bu ikki yildan ortiq vaqtdagi eng past ko‘rsatkichdir.

Uning kapitali asosan Tesla aksiyalari va opsionlaridan iborat. 20-dekabr kuni Mask 7,7 milliard dollar yo‘qotdi, chunki uning aksiyalari narxi oktabr oyidan beri eng past darajaga tushib ketdi.

Avvalroq Ilon Mask dunyoning eng boy odamlari reytingida yetakchilikni boy bergani haqida xabar berilgandi.

Forbes Real Time milliarderlari reytingida Ilon Mask dunyoning eng badavlat odami sifatida birinchi o‘rinni Bernard Arno va uning oilasiga boy berdi.

14-dekabrda tadbirkor Ilon Maskning boyligi 176,8 milliard dollarga, Louis Vuitton Moet Hennessy (LVMH) prezidenti Arno va uning oilasining boyligi esa 188,6 milliard dollarga baholangan.