Germaniya hukumati mahalliy energetika kompaniyasi Uniper’ni milliylashtirish jarayonini yakunladi. Bu haqda mamlakat Moliya, Iqtisodiyot va Iqlimni muhofaza qilish vazirliklarining qo‘shma bayonotiga tayanib Forbes xabar bermoqda.
Germaniya Vazirlar Mahkamasi kompaniyaning jami 99 foizga yaqin aksiyalarini har bir aksiya uchun 1,7 yevrodan sotib oladi.
Hisobotda aytilishicha, hukumat Uniper’ning sobiq eng yirik aksiyadori Fortumdan 6 foiz aksiyalarni 500 million yevroga sotib olmoqda.
Germaniya hukumati 2028-yilga kelib Uniper’ning ulushini 25 foizdan oshmasligi uchun kamaytirish majburiyatini olgan.
Bu muddat faqat Yevropa Komissiyasining ruxsati bilan uzaytirilishi mumkin. Komissiya 20-dekabrda kompaniyani butunlay milliylashtirishni ma’qullagan.
Uniper Germaniyadagi muhim energetika infratuzilmasini boshqaradi hamda elektr energiyasi va tabiiy gaz ta’minotida asosiy rolni o‘ynaydi, deyiladi ikki vazirlik bayonotida.
Kompaniya Rossiyadan “Shimoliy oqim” gaz quvuri orqali gaz yetkazib berishning to‘xtatilishi va 2022-yilda gaz narxining kuchli o‘zgarishi tufayli chuqur inqirozga yuz tutmoqda.
Davlat aralashuvi orqali kompaniyani qutqarish Germaniyani energiya bilan ta’minlash uchun zarur, deb ta’kidladi hukumat.
Noyabr oyi oxirida Uniper Stokgolmdagi xalqaro arbitraj sudida Rossiyaning “Gazprom Export” kompaniyasiga qarshi ish yuritishni boshlaganini e’lon qilgandi. Nemis kompaniyasi gaz yetishmovchiligi tufayli yetkazilgan zararni qoplashni talab qilgan.
“Gazprom” Uniper’ning zararni qoplash bo’yicha da’volarini noqonuniy deb hisoblashini ma’lum qilgan.
Izoh (0)