AQSH prezidentining Milliy xavfsizlik bo‘yicha maslahatchisi Jeyk Sallivan 22-dekabr kuni ozarbayjonlik va armanistonlik hamkasblari bilan alohida telefon suhbatlarida Boku va Yerevanni ikki tomonlama keskinlikni yumshatish va yaxshi qo‘shnichilik munosabatlariga poydevor qo‘yadigan qadamlarni ko‘rib chiqishga chaqirdi. Bu haqda Sallivanning Ozarbayjon prezidenti yordamchisi – Hikmet Hajiyev va Armaniston Xavfsizlik kengashi kotibi Armen Grigoryan bilan muzokaralari yakunlari bo‘yicha Oq uyning yozma bayonotida aytiladi.
“Ushbu suhbatlar chog‘ida ular 27-sentabr kuni Vashingtonda bo‘lib o‘tgan qo‘shma uchrashuvdan keyin Yevropa Ittifoqi va AQSH tomonidan olib borilgan tinchlik muzokaralarida erishilgan yutuqlarni ko‘rib chiqdi. Tomonlarning barchasi tinchlik kelishuviga erishish maqsadida muzokaralarga sodiqligini yana bir bor tasdiqladi. Sallivan har ikki tomonni keskinlikni yumshatish va kelajakda yaxshi qo‘shnichilik munosabatlariga asos bo‘lib xizmat qiladigan qadamlarni ko‘rib chiqishga chaqirdi”, — deyiladi bayonotda.
“Sallivan Lochin yo‘lagi bloklangani va bu holatning gumanitar oqibatlari kuchayib borayotganidan xavotirda ekanimizni qayd etdi va yo‘lak bo‘ylab erkin harakatlanishni to‘liq tiklashga chaqirdi”, — deya xulosa qildi Oq uy.
12-dekabr kuni o‘zlarini ekologlar deb tanishtirgan bir guruh ozarbayjonliklar Lochin yo‘lagini to‘sib qo‘ygan. 14-dekabr kuni Armaniston Ozarbayjonni Lochin yo‘lagini blokdan chiqarishga majburlash talabi bilan Inson huquqlari bo‘yicha Yevropa sudiga murojaat qildi.
Lochin yo‘lagi — Armaniston va Tog‘li Qorabog‘ni bog‘laydigan yagona yo‘l.
Yerevan yo‘lakning to‘silishini Boku tomonidan Tog‘li Qorabog‘da gumanitar falokat yaratishga qaratilgan provokatsiya sifatida baholadi. Armaniston bosh vaziri Nikol Pashinyanning aytishicha, yo‘lak to‘sib qo‘yilgani sababli Tog‘li Qorabog‘da oziq-ovqat taqchilligi boshlangan.
Armaniston bosh vaziri, shuningdek, Rossiya tinchlikparvar korpusi kuchlarini o‘z majburiyatlarini bajarmayotgani uchun tanqid qildi. “Albatta, bu Ozarbayjonning harakatlari bilan bog‘liq, ammo bu masalaning mohiyatini o‘zgartirmaydi. Rossiya tinchlikparvar kuchlarining u yerdan bo‘lishidan asosiy maqsad — noqonuniy harakatlarga yo‘l qo‘ymaslik va Lochin yo‘lagini nazorat ostida ushlab turish”, — dedi bosh vazir.
Izoh (0)