АҚШ президентининг Миллий хавфсизлик бўйича маслаҳатчиси Жейк Салливан 22 декабрь куни озарбайжонлик ва арманистонлик ҳамкасблари билан алоҳида телефон суҳбатларида Боку ва Ереванни икки томонлама кескинликни юмшатиш ва яхши қўшничилик муносабатларига пойдевор қўядиган қадамларни кўриб чиқишга чақирди. Бу ҳақда Салливаннинг Озарбайжон президенти ёрдамчиси – Ҳикмет Ҳажиев ва Арманистон Хавфсизлик кенгаши котиби Армен Григорян билан музокаралари якунлари бўйича Оқ уйнинг ёзма баёнотида айтилади.
«Ушбу суҳбатлар чоғида улар 27 сентябрь куни Вашингтонда бўлиб ўтган қўшма учрашувдан кейин Европа Иттифоқи ва АҚШ томонидан олиб борилган тинчлик музокараларида эришилган ютуқларни кўриб чиқди. Томонларнинг барчаси тинчлик келишувига эришиш мақсадида музокараларга содиқлигини яна бир бор тасдиқлади. Салливан ҳар икки томонни кескинликни юмшатиш ва келажакда яхши қўшничилик муносабатларига асос бўлиб хизмат қиладиган қадамларни кўриб чиқишга чақирди», — дейилади баёнотда.
«Салливан Лочин йўлаги блоклангани ва бу ҳолатнинг гуманитар оқибатлари кучайиб бораётганидан хавотирда эканимизни қайд этди ва йўлак бўйлаб эркин ҳаракатланишни тўлиқ тиклашга чақирди», — дея хулоса қилди Оқ уй.
12 декабрь куни ўзларини экологлар деб таништирган бир гуруҳ озарбайжонликлар Лочин йўлагини тўсиб қўйган. 14 декабрь куни Арманистон Озарбайжонни Лочин йўлагини блокдан чиқаришга мажбурлаш талаби билан Инсон ҳуқуқлари бўйича Европа судига мурожаат қилди.
Лочин йўлаги — Арманистон ва Тоғли Қорабоғни боғлайдиган ягона йўл.
Ереван йўлакнинг тўсилишини Боку томонидан Тоғли Қорабоғда гуманитар фалокат яратишга қаратилган провокация сифатида баҳолади. Арманистон бош вазири Никол Пашиняннинг айтишича, йўлак тўсиб қўйилгани сабабли Тоғли Қорабоғда озиқ-овқат тақчиллиги бошланган.
Арманистон бош вазири, шунингдек, Россия тинчликпарвар корпуси кучларини ўз мажбуриятларини бажармаётгани учун танқид қилди. «Албатта, бу Озарбайжоннинг ҳаракатлари билан боғлиқ, аммо бу масаланинг моҳиятини ўзгартирмайди. Россия тинчликпарвар кучларининг у ердан бўлишидан асосий мақсад — ноқонуний ҳаракатларга йўл қўймаслик ва Лочин йўлагини назорат остида ушлаб туриш», — деди бош вазир.
Изоҳ (0)