Тошкентдаги автобусларга қоидабузарликни қайд этувчи видеорегистраторлар ўрнатилиши кутилмоқда. Бу ҳақда ИИВ Жамоат хавфсизлиги департаменти йўл-ҳаракат хавфсизлиги бошқарма бошлиғи Фазлиддин Тошкенбоев маълум қилди.
Унинг таъкидлашича, жамоат транспорти учун мўлжалланган йўлаклардан фойдаланган ва ўз автомобилини бекатларга қоидага зид равишда қолдириб кетган ҳайдовчиларга чора кўриш бўйича янги тизим ишга тушади.
«Автомобильларнинг йўл ёқаларига тартибсиз қолдириб кетиш ҳолатлари жуда кўп. Бунинг олдини олиш мақсадида жамоат транспортларига видеорегистраторлар ўрнатиш режалаштирилган. Бу орқали инсон омилини чеклаган ҳолда қоидабузарларга нисбатан жазо чораларини қўллаш йўлга қўйилади», — деди Тошкентбоев.
Пойтахт ҳокими Жаҳонгир Ортиқхўжаев, ички ишлар вазири ўринбосари Бекмурод Абдуллаев ва «Тошшаҳартрансхизмат» бошқарув раиси Анвар Жўраев бошчилигида пойтахтдаги жамоат транспорти муаммоларини ҳал қилиш юзасидан идоралараро тезкор ишчи гуруҳи масъуллари йиғилишида бир қатор вазифалар қаторида машинани ноқонуний тарзда йўл четлари ва бозор атрофларида қолдириб, сунъий тирбандлик келтириб чиқараётганларга чора кўриш белгиланганди.
Ноябрь ойида Самарқанд вилоятидаги аксарият автобусларга шундай видеорегистратор ускуналари ўрнатилганди.
Мавзуга доир:
Изоҳ (0)