Ўзбекистон банклари ўн бир ойда қарийб 9 трлн сўмлик соф фойдага эришган — Марказий банк

Ўзбекистон банклари томонидан жорий йилнинг январь—ноябрь ойлари давомида 86,7 трлн сўмлик даромад олинган. Бу ҳақда Марказий банк хабар бермоқда.

Бунда фоизсиз даромадлар 29,9 трлн сўмни, фоизли даромадлар эса 56,8 трлн сўмни ташкил қилган. 

Ўн бир ойда Ўзбекистон банкларининг фоизли ва фоизсиз харажатлари мос равишда 35,1 трлн сўм ва 10,3 тлрн сўм бўлган. Шунингдек, банклар томонидан 12,4 трлн сўмлик операцион харажатлар қилинган. 

Йил бошидан бери Ўзбекистондаги банклар 2,7 трлн сўмлик фойда солиғини тўлаган. Бу ўтган йилга нисбатан 1,3 трлн сўмга кўп.

Банклар жорий йилда 8,8 трлн сўм соф фойда кўрган. Улар томонидан сентябрь ва октябрь ойларида 1 трлн сўмдан соф фойдага эришилган эди. Бу кўрсаткич ноябрь ойида 724 млрд сўмни ташкил қилган. 

Январь—ноябрь ойларига кўра соф фойда миқдори ўтган йилнинг мос даврига нисбатан 3,2 трлн сўмга кўпайган.

Аввалроқ Ўзбекистонда банклар устав капиталининг энг кам миқдорини ошириш таклиф қилинаётгани ҳақида хабар берилган эди.