O‘zbekistonda so‘m 2022-yilning noyabr oyida o‘tgan oyga nisbatan pasayuvchi dinamika qayd etib, 1 foizga qadrsizlandi. Bu haqda Markaziy bank xabar bermoqda (pdf).
So‘m 2021-yil mos davriga nisbatan 1,1 foizga, bazaviy oy — 2019-yilning sentabriga nisbatan 7 foizga mustahkamlandi.
Noyabr oyidagi so‘m kursining qadrsizlanishi asosan savdo-hamkor davlatlar valyuta kurslarining mustahkamlanishi, savdo-hamkor mamlakatlar inflyatsiyalari ta’sirlari bilan izohlanmoqda.
Mazkur indeksni oshiruvchi omillar bo‘lib ichki inflyatsiya — 1,3 foiz bandni tashkil etdi.
Pasaytiruvchi omillar bo‘lib:
- savdo-hamkor davlatlar inflyatsiyasi — 0,8 foiz band;
- valyuta kurslari — 0,8 foiz band,
- so‘m almashuv kursi — 0,8 foiz band hissa qo‘shdi.
Asosiy savdo-hamkor davlatlarning valyutalari kursi noyabr oyida AQSH dollariga nisbatan mustahkamlanib borgan.
Rossiya rubli noyabr oyida 1,2 foizga mustahkamlandi. Bu neft kotirovkalari va global darajada nisbatan zaiflashib borayotgan dollar indeksi bilan bog‘liq.
Qozog‘iston tengesi noyabr oyida 1,8 foizga mustahkamlandi. Yirik yuridik shaxslar tomonidan budjetga soliq to‘lovlarini milliy valyutada amalga oshirishlari tengega bo‘lgan talabni oshirayotgani, kichik bo‘lsa-da kurs mustahkamlanishiga sabab bo‘lmoqda.
Xitoyda ko‘chmas mulk bozorining tiklanib borishi, pandemiya bo‘yicha cheklovlarning yumshatila boshlagani investorlarni jalb qilmoqda. Bu o‘z o‘rnida yuan kursining mustahkamlanishiga xizmat qilmoqda. O‘tgan oyga nisbatan noyabr oyida yuan kursi 0,3 foizga mustahkamlandi.
Turkiya lirasida noyabr oyi davomida keskin o‘zgarishlar kuzatilmadi.
Izoh (0)