Markaziy bank 2022-yil 1-dekabr holatiga ko‘ra banklarning muammoli kreditlari to‘g‘risida ma’lumot berdi.
Unga ko‘ra, banklardagi jami kredit portfeli 382,1 trln so‘mgacha yetgan. Bu o‘tgan oyga nisbatan 6,8 trln so‘mga ko‘proqdir.
Noyabr oyida banklardagi umumiy muammoli kreditlar (NPL) miqdori qariyb 801 mlrd so‘mga kamayib, 15,3 trln so‘mni tashkil qilgan.
Iyul oyida bu ko‘rsatkich 250 mlrd so‘mga, avgust oyida esa 500 mlrd so‘mga oshgan edi. Sentabr va oktabrda oylarida muammoli kreditlar kamaya boshladi — mos ravishda 300 mlrd so‘m va 968 mlrd so‘mga.
O‘tgan oyda umumiy kredit portfelidagi NPL ulushi 0,3 foizga tushib, 4 foiz bo‘lib turibdi.
Banklar orasida NPL miqdori eng ko‘p “Xalq banki”da saqlanib qolmoqda va o‘tgan oyga nisbatan 219 mlrd so‘mga pasaygan — 3,1 trln so‘m.
NPL ulushi bo‘yicha eng baland ko‘rsatkich “O‘zagroeksporbank”da — bankning jami kreditlardagi NPL ulushi 95,9 foizni tashkil qildi.
Avvalroq O‘zbekiston banklari o‘n oyda 80 trln so‘mga yaqin daromad olgani haqida xabar berilgan edi. Bu davrda banklarning sof foydasi 8 trln so‘mdan oshgan.
Izoh (0)