O‘zbekistonda muomaladagi naqd pul miqdori kamayishda davom etmoqda

O‘zbekistonda noyabr oyida muomaladagi naqd pul miqdori 41,3 trln so‘mni tashkil qildi. Bu haqda “Daryo”ga Markaziy bank hisobotidan ma’lum bo‘ldi.

Muomaladagi naqd pul miqdori noyabrda 2,4 trln so‘mga kamaygan. Bu miqdor oktabr oyida ham 8 mlrd so‘mga kamaygan edi.

Ma’lumotlarga ko‘ra, noyabrda milliy valyutadagi pul massasi 300 mlrd so‘mga oshib, 125,1 trln so‘mni tashkil etmoqda.

Shuningdek, oktabr oyida 46,5 trln so‘mni tashkil etgan chet el valyutasidagi omonatlar 5,5 trln so‘mga ko‘payib 52 trln so‘mga yetgan.

Muomalaga chiqarilgan naqd pullar may oyida 3,7 trln so‘mga ko‘paygan bo‘lsa, iyun oyida bu ko‘rsatkich 3,6 trln so‘m bo‘lgan edi.

Iyul oyida naqd pul miqdori ko‘payishi sekinlashdi va 1,9 trln so‘mga o‘sdi. Avgust oyida esa fevral oyidan beri ilk bor bu ko‘rsatkich kamaydi — 79 mlrd so‘mga.

Sentabr oyida muomaladagi naqd pullar 1,4 trln so‘mga ko‘payib, 43,786 trln so‘mga yetgandi.

Markaziy bank tomonidan joriy yilning dastlabki 6 oyi mobaynida muomalaga qo‘shimcha 13,6 trln so‘m naqd pullar chiqarilgan.

Avvalroq O‘zbekistonda to‘qqiz oyda qancha pul bankomatlar orqali naqdlashtirilgani ma’lum bo‘lgandi.