AQSH Federal zaxira tizimi (Fed) asosiy stavkasini 50 bazis punktga oshirib, 4,25—4,50 foizga yetkazdi. Bu haqda “Daryo”ga regulyator hisobotidan ma’lum bo‘ldi.
Fed, shuningdek, 2022-yilda AQSH YIM o‘sishi prognozini 0,5 foizga (ilgari 0,2 foizga prognoz qilingan) yaxshiladi. Mamlakatning 2023—2024-yillarga mo‘ljallangan YIM o‘sishi prognozlari mos ravishda 1,2 —1,7 foizdan 0,5—1,6 foizga yomonlashdi.
Ma’lumotlarga ko‘ra, maksimal bandlikni va inflyatsiyani 2 foiz darajasida qo‘llab-quvvatlash uchun qo‘mita federal mablag‘lar stavkasi uchun maqsadli diapazonni 4,25—4,50 foizgacha oshirishga qaror qildi.
“Qo‘mita inflyatsiyani vaqt o‘tishi bilan 2 foizga qaytarish uchun yetarli darajada cheklovchi pul-kredit siyosatiga erishishda maqsadli diapazondagi o‘sishlarning davom etishini kutmoqda”, — deyiladi hisobotda.
Maqsadli diapazonda kelajakdagi o‘sish sur’atlarini belgilashda qo‘mita pul-kredit siyosatining qat’iylashtirilishini, uning iqtisodiy faollik va inflyatsiyaga ta’sir qilishdagi kechikishlarini, iqtisodiy va moliyaviy o‘zgarishlarni hisobga oladi.
So‘nggi oylarda mamlakatda ish o‘rinlari soni sezilarli darajada oshdi, ishsizlik darajasi pastligicha qolmoqda.
Inflyatsiya yuqoriligicha qolmoqda, bu pandemiya bilan bog‘liq talab va taklif nomutanosibligini, oziq-ovqat va energiya narxlarining ko‘tarilishini va kengroq narx bosimini aks ettiradi.
Noyabr oyidagi yig‘ilish natijalariga ko‘ra, stavka yiliga 3,75—4 foiz oralig‘iga olib kelindi. Stavkaning o‘sish bosqichi 0,75 foiz darajani tashkil etdi — bu ketma-ket to‘rtinchi marta o‘sish.
Avvalroq AQSH Federal rezerv tizimi ketma-ket uchinchi marta bazaviy stavkani 0,75 foizga oshirgani haqida xabar berilgandi.
Izoh (0)