Жаҳон банки Украинага ёрдам учун 610 млн доллар ажратишни маъқуллади

Жаҳон банки «Украинанинг шошилинч эҳтиёжларини қондириш учун» 610 миллион доллар ажратишга рози бўлди. Бу ҳақда банк веб-сайтида хабар қилинди.

Молиявий пакет «Украинага ёрдам бериш ва уни қайта тиклаш бўйича саъй-ҳаракатларни кучайтириш лойиҳаларини ўз ичига олади», — дейилади баёнотда. Унинг доирасида Жаҳон банки Украинага Халқаро тикланиш ва тараққиёт банкидан (ХТТБ, Жаҳон банкининг бир қисми) 500 миллион доллар кредит ажратишга қарор қилди.

Кредит Буюк Британия кафолати остида берилмоқда. Пул «Украина ҳукуматига болалар ва оилалар нафақалари, давлат хизматчиларининг маошлари ва коммунал тўловлар билан боғлиқ харажатларни қоплашга ёрдам беради», — дейилади ташкилот хабарида.

«Жаҳон банки Украинани соғлиқни сақлаш хизматларидан фойдаланиш имкониятини тиклаш ва яхшилаш бўйича янги лойиҳа билан ҳам қўллаб-қувватламоқда», — дея қўшимча қилди матбуот хизмати.

Гап Health Энҳанcемент анд Life-савинг лойиҳаси (ҲЕАЛ Украине, «Саломатликни яхшилаш ва ҳаётни сақлаб қолиш») ҳақида бормоқда. Жаҳон банки лойиҳанинг бирламчи тиббий ёрдамни кучайтириши, «уруш туфайли руҳий саломатлик ва реабилитация хизматларига ортиб бораётган талабни қондириши, касалхоналарда соғлиқни сақлаш хизматларини кўрсатишни тиклаш ва кучайтириши» ҳамда асосий соғлиқни сақлаш муассасалари салоҳиятини ривожлантиришни қўллаб-қувватлашига умид қилмоқда.

Ушбу дастур ХТТБнинг яна 100 миллион евролик кредити (106 миллион доллардан ортиқ) ва Глобал молиялаштириш фондининг 10 миллион долларлик гранти ҳисобидан молиялаштирилади. Жаҳон банки келгусида молиялаштиришни 500 миллион долларгача ошириши кутилмоқда.

Умуман олганда, февраль ойидан бери Жаҳон банки Украинани қўллаб-қувватлаш учун 18 миллион доллар ажратди. 20 декабрь куни Украина Молия вазирлиги давлат бюджетига АҚШ томонидан Жаҳон банки орқали ўтказилган 2 миллиард доллар тушганини маълум қилди.