Америка томони навбатдаги ҳарбий ёрдам пакети доирасида Украинага Patriot зенит-ракета мажмуаларини ҳамда ўқ-дориларни «ақлли» бомбаларга айлантирадиган ускуналарни юборади. Бу ҳақда CNN ўз манбаларига таяниб хабар бермоқда. Қурол-яроғлар келаси ҳафтадаёқ Украина қуролли кучларига етказиб берилиши кутилмоқда.
«Юқори аниқликдаги бомбалар Украинага Россиянинг турғун мудофаа чизиқлариҳа ёки бошқа йирик объектларга ҳужум қилишда ёрдам беради. Бироқ уларни қирувчилардан ташлаш керак, бу эса Россиянинг ўз ҳаво ҳужумига қарши мудофаа тизимлари борлиги учун жиддий муаммо бўлиб қолмоқда», — дейилади нашр хабарида.
CNN бошқа тафсилотларни келтирмаяпти.
Украина президенти Владимир Зеленский 21 декабрь куни АҚШ президенти Жо Байден билан учрашиш учун Вашингтонга учиб кетгани хабар берилмоқда. Зеленский Patriot ракета тизимларини ўз ичига оладиган ҳарбий ёрдамнинг янги пакетини муҳокама қилиш учун Байден билан кўришишни режалаштирмоқда.
Зеленский 18 декабрь куни Байден билан Киевга Patriot зенит-ракета мажмуаларини етказиб бериш ҳақидаги музокаралар ижобий натижага қараб силжиётганини айтганди. «Мен бу масалага позитив билан қарайман. Катта позитив билан», — деганди у.
Украина президенти «жараён бораётгани»ни ва етказиб бериш масаласи билан шахсан ўзи шуғулланаётганини қўшиб қўйганди.
Киев АҚШ ва иттифоқдошларидан ҳаво ҳужумига қарши мудофаанинг универсал воситаси сифатида фойдаланиладиган Patriot зенит-ракета мажмуаларини етказиб беришни бир неча марта сўраган. Украина ташқи ишлар вазири Дмитрий Кулеба ушбу тизимлар Украинанинг муҳим инфратузилмасини ҳимоя қила олишини айтганди.
Аввалроқ CNN АҚШ президенти Жо Байден маъмурияти Украинага Patriot зенит-ракета мажмуаларини юборишга тайёргарлик жараёнини якунлаётгани ҳақида хабар берганди.
Patriot зенит-ракета мажмуаси юборилишини Пентагон раҳбари Ллойд Остин маъқуллаши керак, шундан кейин эса қарор Байден томонидан тасдиқланади.
Изоҳ (0)