АҚШ Конгресси Россияни «агрессор давлат» деб тан олувчи қонун лойиҳасини ишлаб чиқмоқда, дея хабар берди The Hill. Нашрнинг Конгрессдаги манбаларига таяниб ёзишича, ҳозир қонун лойиҳаси матни президент Жо Байден маъмурияти билан муҳокама қилинмоқда. Улар бу қонун Россияни «терроризм ҳомийси» деб атамаслик учун зарур эканини айтди.
Агар қонун лойиҳаси қабул қилинса, АҚШ президенти Россияни ва «Украинага қарши агрессив ҳаракатларга алоқадор» деб ҳисобланган исталган хорижий давлатни «агрессор давлат» деб эълон қилиши мумкин бўлади. Шунингдек, ҳужжат АҚШ президентига «тажовуз учун жавобгар бўлган ёки унга алоқадор» ҳар қандай шахсга нисбатан санкциялар қўллаш имконини беради», деб таъкидлайди газета. Аммо матн танқидчиларининг айтишича, қўшимчалар ортиқча, чунки Жо Байден маъмурияти Россиянинг юқори мартабали амалдорларига нисбатан аллақачон санкциялар киритган.
Ҳужжат шунингдек, «агрессор давлат» атамаси «терроризмга ҳомийлик қилувчи давлат» атамасидан «риторик жиҳатдан кучсизроқ» бўлгани учун ҳам танқид қилинмоқда, деб таъкидлади The Hill.
Исми ошкор қилинмаган Украина расмийларининг нашрга айтишича, «агрессор давлат» мақоми уларнинг Россияни терроризм ҳомийси сифатида тан олиш ҳақидаги илтимосига мос келмайди. Шунга қарамай, уларнинг фикрича, Киев бу чорани қўллаб-қувватлаши мумкин, айниқса бунинг ортидан «агрессор давлатларни жазолаш учун қўшимча воситалар» ишлаб чиқилса.
23 ноябрь куни Европарламент Россияни Украинадаги ҳарбий амалиётлар муносабати билан терроризмга ҳомийлик қилувчи давлат сифатида тан олиш тўғрисидаги резолюцияни қабул қилганди. Ҳужжат юридик кучга эга эмас ва маслаҳат характерига эга, чунки Европа Иттифоқи қонунчилигида «терроризмни ҳомийлик қилувчи давлат» тушунчаси ҳали мавжуд эмас. Европа Иттифоқига кирувчи қатор давлатлар, хусусан, Литва, Латвия, Польша, Эстония ҳам худди шундай ҳужжатларни қабул қилди.
АҚШ қонунчилигида эса «терроризм ҳомийси бўлган давлат» таърифи мавжуд ва бирор давлатни бундай рўйхатга киритиш тўғрисидаги қарор Давлат департаменти томонидан қабул қилинади. Ҳозир унга Сурия, Эрон, Шимолий Корея ва Куба киради. Қўшма Штатлар томонидан ҳар қандай давлатнинг терроризм ҳомийси сифатида тан олиниши жиддий чекловларни назарда тутади: мудофаа сектори учун товарлар экспортини тақиқлаш, ҳам фуқаролик, ҳам ҳарбий мақсадли маҳсулотлар экспортини назорат қилиш, молиявий чекловлар ва бошқалар. Шунингдек, қонунга кўра, агар бирор давлат терроризм ҳомийси сифатида тан олинса, Қўшма Штатлар у билан савдо алоқаларини сақлаб турган бошқа давлатларга нисбатан санкциялар қўллаши мумкин.
Изоҳ (0)