Hindistonning Peddapuram shahrida bir erkak kinoteatrda “Avatar: Suv yo‘li” filmini tomosha qilish chog‘ida yurak xurujidan vafot etdi, deb xabar beradi India Today.
Ta’kidlanishicha, kinoseans o‘rtasida hindistonlikning mazasi qochgan va hushini yo‘qotgan. U bilan birga kinoteatrda bo‘lgan ukasi zudlik bilan uni kasalxonaga yetkazgan, biroq shifokorlar uning o‘limini qayd etgan, xolos.
Nashr ma’lumotlariga ko‘ra, 2010-yilda Tayvandagi kinoteatrda “Avatar” filmining birinchi qismini ko‘rish paytida tomoshabinlardan biri vafot etgan. U syujet tufayli ortiqcha asabiylashib, qahramonlar uchun shunchalik qattiq hayajonlanganki, bunga yuragi dosh bera olmagan. 42 yoshli tayvanlik vafot etgan. Uni ko‘zdan kechirgan shifokor “film tomosha qilish natijasida qattiq hayajonlanish” yurak xurujiga sabab bo‘lganini aytgan.
“Avatar” filmining yangi qismi birinchi filmi taqdim etilganidan 13 yil o‘tib kinoteatrlarda namoyish etilmoqda. Filmda aktyor Sem Uortington tomonidan gavdalantirilgan qahramon Jeyk Salli va uning oilasi doimiy yashash joylarini tark etishga va Pandora sayyorasining aniqlanmagan hududlariga borishga majbur bo‘ladi.
Shuningdek, kinokartinada Zoi Saldana, Sigurni Uiver, Keyt Uinslet, Stiven Leng, Mishel Yeo va boshqa mashhur aktyorlar suratga tushgan. Filmning davomiyligi 3 soat-u 12 daqiqani tashkil qiladi.
Mavzuga doir:
- “Avatar: Suv yo‘li” filmining yangi treyleri namoyish etildi (video)
- “Avatar 2: Suv yo‘li” filmining kassa yig‘imlari 649 mln dollar bo‘lishi mumkin
- “Avatar”dan 13 yil o‘tib, ikkinchi qism — “Avatar: Suv yo‘li” filmi ekranlarga chiqmoqda. Yangi qism nima haqida bo‘ladi?
- Yaqinlashib kelayotgan yurak xurujidan ogohlantiruvchi 6 alomat
Izoh (0)