Isroil falastinlik advokat Saloh Hamurini terrorchilik faoliyatiga aloqadorlikda ayblab, Fransiyaga deportatsiya qildi, deb xabar bermoqda Al Jazeera.
Fransiya fuqaroligiga ega bo‘lgan Hamuri mart oyidan beri ma’muriy hibsda saqlanayotgan edi — bu Isroil hukumatiga gumonlanuvchilarni ayblovsiz va ularga qarshi dalillarsiz ham bir necha oylar davomida hibsda saqlash imkonini beradigan usul. Advokat o‘ziga qo‘yilgan barcha ayblovlarni rad etdi.
Hamuri Falastinni ozod qilish xalq frontiga yaqin bo‘lgani uchun terrorchilik faoliyatiga aloqadorlikda gumon qilinib, hibsga olingan. U 2021-yil oktabr oyida Isroil tomonidan terrorchi tashkilot deb e’lon qilingan Falastinning Addameer inson huquqlari tashkiloti va boshqa ko‘plab nohukumat tashkilotlarida ishlagan.
Isroil ichki ishlar vaziri Ayelet Shaked 2021-yil oktabr oyida Hamurining Quddusda yashash huquqini bekor qilgandi.
Isroil da’vosiga ko‘ra, Hamurining o‘zi Isroil, AQSH va Yevropa Ittifoqi tomonidan terrorchi tashkilot sifatida ro‘yxatga olingan Falastinni ozod qilish xalq fronti a’zosi, biroq bu ayblovlar haqida hech qanday ochiq dalillar keltirmagan.
Izoh (0)