Turkiyaning yangi Tayfun ballistik raketasi 1000 kilometr masofani bosib o‘ta oladi, dedi Turkiya prezidenti Rajab Toyyib Erdo‘g‘on. Bu haqda Anadolu xabar berdi.
“Tayfun raketasining uchish masofasi 560 kilometr deb aytilgandi, biroq biz hatto 560 kilometrni ham yetarli deb hisoblamaymiz. O‘tgan hafta uchrashuv o‘tkazdim. Yakuniy vaziyat qandayligini so‘radim. Ular Tayfunda 1000 kilometr masofani bosib o‘tamiz, deyishdi”, — dedi Erdo‘g‘on.
Erdo‘g‘on Gretsiya Turkiyadagi bunday texnologik o‘zgarishlardan qo‘rqishi kerakligini ta’kidladi va uni Anqara bilan “bahslashmaslik” haqida ogohlantirdi. U Turkiya Egey dengizida Afina bilan to‘qnashish kayfiyatida emasligini ta’kidladi.
Turkiya oktabr oyida Tayfun raketasini sinovdan o‘tkazgan edi. Bloomberg manbalariga ko‘ra, u 561 kilometr masofani bosib o‘tgan. Bloomberg ta’kidlashicha, raketa Turkiyada ishlab chiqilgan barcha turdagi qurollar ichida eng uzoq masofaga uchuvchi hisoblanadi.
Dekabr oyida Erdo‘g‘on, agar Gretsiya Turkiya qirg‘oqlari yaqinida joylashgan Dodekanes orollariga Amerika qurollarini joylashtirishga harakat qilsa, Anqara bunga javob sifatida raketadan foydalanish mumkinligi haqida ogohlantirdi. Turkiya prezidenti shunday ssenariy yuz bersa, qo‘shni davlat hududiga, jumladan, poytaxtga ham zarba berilishi mumkinligini tan oldi.
Ma’lumot uchun Dodekanes arxipelagiga 15 ta katta va 150 ta kichik orollar, jumladan, Rodos kiradi, ularning umumiy maydoni 2670 kvadrat kilometr. Orollar Turkiyaning janubi-g‘arbiy qismida joylashgan bo‘lib, ba’zi joylarda Gretsiya va Turkiya hududlari orasidagi masofa 5 kilometrga ham yetmaydi.
Izoh (0)