Туркиянинг янги Тайфун баллистик ракетаси 1000 километр масофани босиб ўта олади, деди Туркия президенти Ражаб Тоййиб Эрдўғон. Бу ҳақда Anadolu хабар берди.
«Тайфун ракетасининг учиш масофаси 560 километр деб айтилганди, бироқ биз ҳатто 560 километрни ҳам етарли деб ҳисобламаймиз. Ўтган ҳафта учрашув ўтказдим. Якуний вазият қандайлигини сўрадим. Улар Тайфунда 1000 километр масофани босиб ўтамиз, дейишди», — деди Эрдўғон.
Эрдўғон Греция Туркиядаги бундай технологик ўзгаришлардан қўрқиши кераклигини таъкидлади ва уни Анқара билан «баҳслашмаслик» ҳақида огоҳлантирди. У Туркия Эгей денгизида Афина билан тўқнашиш кайфиятида эмаслигини таъкидлади.
Туркия октябрь ойида Тайфун ракетасини синовдан ўтказган эди. Bloomberg манбаларига кўра, у 561 километр масофани босиб ўтган. Bloomberg таъкидлашича, ракета Туркияда ишлаб чиқилган барча турдаги қуроллар ичида энг узоқ масофага учувчи ҳисобланади.
Декабрь ойида Эрдўғон, агар Греция Туркия қирғоқлари яқинида жойлашган Додеканес оролларига Америка қуролларини жойлаштиришга ҳаракат қилса, Анқара бунга жавоб сифатида ракетадан фойдаланиш мумкинлиги ҳақида огоҳлантирди. Туркия президенти шундай сценарий юз берса, қўшни давлат ҳудудига, жумладан, пойтахтга ҳам зарба берилиши мумкинлигини тан олди.
Маълумот учун Додеканес архипелагига 15 та катта ва 150 та кичик ороллар, жумладан, Родос киради, уларнинг умумий майдони 2670 квадрат километр. Ороллар Туркиянинг жануби-ғарбий қисмида жойлашган бўлиб, баъзи жойларда Греция ва Туркия ҳудудлари орасидаги масофа 5 километрга ҳам етмайди.
Изоҳ (0)