Rossiyaning Ukrainaga hujumida raketalar bazasi tugasa qanday yo‘l tutiladi?
Rossiyada Ukrainaga yana 3—4 marta yoppasiga hujum qilish uchun yetarli raketalar qoldi. Bu haqda Ukraina Milliy xavfsizlik va mudofaa kengashi kotibi Aleksey Danilov ma’lum qildi.
Uning aytishicha, Rossiya raketalarni qo‘llash me’yoridan allaqachon o‘tib bo‘lgan. Biroq raketalardan bunday foydalanish Rossiya qo‘shinlari uchun nomaqbuldir.“U holda ular butunlay raketasiz qoladi, bu esa nomaqbul holat, axir ularda umuman boshqacha vaziyatlar yuzaga kelishi mumkin, shu sababli ular qandaydir zaxira qoldirishi kerak. Biroq ularda S-300 raketalari bor, ularni, afsuski, bizning shaharlarimizga qarshi ishlatishyapti”, — degan Danilov.
Uning qo‘shimcha qilishicha, Erondan ballistik raketalar yetkazib berilishi xavfi ham mavjud.
Avvalroq Ukraina Mudofaa vazirligi razvedka bosh boshqarmasi vakili Andrey Yusov Rossiya Erondan Shahed-136 kamikadze dronlarining yangi partiyasini olganini ma'lum qilgan edi.
Ammo dronlarning navbatdagi partiyasi avvalgilariga qaraganda kamroq bo'lgani bois rossiyaliklar endi bu dronlardan avaylab foydalanmoqda.
Turkmanistondan Ozarbayjonga gaz quvuri quriladimi yoki yo‘q?
Turkmanistonda 14-dekabr kuni o'tkazilgan Turkmaniston, Turkiya va Ozarbayjon rahbarlari sammitida turkman gazini Ozarbayjon va Turkiya orqali Yevropa bozoriga tranzit qilish masalasi asosiy mavzu bo'lgan edi.
“Xronika Turkmenistana” nashri Turkiya prezidentining quyidagi fikrlarini keltiradi:
“Butun dunyo, ayniqsa Yevropa uchun energiya xavfsizligi yanada muhim. Bu borada Boku–Tbilisi–Jayhon neft quvuri va Janubiy gaz koridori alohida ajralib turadi. Biz bu yo‘lak orqali Kaspiy gazini Yevropaga yetkazamiz. Endi Turkmaniston tabiiy gazini xuddi shunday tarzda G‘arb bozorlariga uzatish ustida ish boshlashimiz kerak”, — degandi Erdo‘g‘on.
Middle East Eye nashri yozishicha Turkiya rahabrining nutqida tomonlar yangi gaz quvuri qurish imkoniyatini o‘rganayotgani haqida to‘g‘ridan to‘g‘ri aytiladi.Biroq Turkmen news qayd etishicha, 16-dekabr kuni rossiyalik senator Aleksandr Bashkin “Astraxanskiye Novosti” nashriga izoh berib, Rossiya Kaspiy orqali gaz quvuri qurilishiga rozilik bermasligini aytgan.“Yevropada Turkmanistondan Bokuga transkaspiy gaz quvurini qurish, u yerdan esa Turkiya orqali Yevropaga tashish istiqbollari yana muhokama qilina boshladi.Shuni bilish kerakki, beshta Kaspiybo‘yi davlatlar tomonidan imzolangan Kaspiyning maqomi bo‘yicha hujjatga muvofiq, ekologik xavfsizlik sohasiga ta’sir qiladigan loyihalarni amalga oshirish uchun Kaspiy beshligining barcha davlatlari rozilik berishi kerak. Gaz quvurining suv ostidan o‘tadigan qismi Kaspiy dengizi ekologik xavfsizligiga tahdid solishi mumkinligini hisobga olib, Rossiya uni qurishga rozilik bera olmaydi”, — dedi Bashkin.Turkmaniston tomoniga esa senator “bizga do‘st bo‘lgan ushbu mamlakatda qazib olinayotgan har qanday hajmdagi gazni Xitoy, Hindiston va Rossiya to‘liq hajmda qabul qilishga qodir”, — deya vaziyatni izohlagan.
Markaziy Osiyo davlatlaridagi fuqarolar endi Rossiyaga emas Yaponiyaga ishlagani boradimi?
Yaponiya hukumati chet el fuqarolariga qo‘l mehnati bilan bog‘liq ishlarni bajarishga imkon beruvchi “maxsus malakali ishchilar dasturi” orqali Markaziy Osiyo davlatlaridan ko‘proq xorijiy ishchi kuchini olib kelishni rejalashtirmoqda. Bu haqda The Japan News xabar berdi.
Yaponiya tashqi ishlar vaziri Yoshimasa Xayashi 24-dekabr kuni Tokioda Yaponiya va Markaziy Osiyoning beshta davlati tashqi ishlar vazirlari o‘rtasidagi uchrashuvda bu reja haqida ma’lum qilishi kutilmoqda.
Xayashi Yaponiyaning “odamlarga sarmoya kiritish” va “o‘sish sifati”ga urg‘u berib, Markaziy Osiyoning barqaror rivojlanishiga hissa qo‘shishini qayd etadi.Yaponiya 2019-yilda O‘zbekiston bilan inson resurslarini qabul qilish bo‘yicha hamkorlik memorandumini imzolagan.
Markaziy osiyolik mehnat muhojirlarining aksariyati Rossiyada ishlaydi. Yaponiya tashqi ishlar vazirligining yuqori martabali rasmiysi aytishicha, bu davlatlardan ko‘proq chet ellik ishchilarni qabul qilish va “ishchilarga malakasini oshirib, undan o‘z vatanida foydalanishga ruxsat berish” orqali Rossiyaga qaramlikni kamaytirish mumkin.
Markaziy Osiyo juda ko‘p tabiiy resurslarga, jumladan neftga ega, ammo eksport asosan qo‘shni Xitoy va Rossiya bilan chegaralangan. 17-dekabr kungi yig‘ilishda Xayashi, shuningdek, Yaponiya Markaziy Osiyoning besh davlatiga eksport bozorlarini diversifikatsiya qilishda yordam berishini va dekarbonizatsiya texnologiyalarini ishlab chiqishda hamkorlik qilishini ma’lum qilgan.
O‘zbekiston davlat budjetiga o‘zgartirishlar kiritish masalasi. Avtomobil sanoatidagi o‘zgarayotgan raqamlar
O‘zbekistonda 2022-yil davlat budjetiga o‘zgartirish to‘g‘risida masala ko‘rib chiqilmoqda. Bu haqda deputat Rasul Kusherbayev Telegram sahifasida xabar bermoqda.
Deputatlar qo‘liga shoshilinch berilgan Vazirlar Mahkamasi tomonidan kiritilgan qonun loyihasi ko‘ra, 2022-yil budjetidan eksport qilinadigan mamlakatlarda mahalliy avtomobil sanoati korxonalari tomonidan to‘lanadigan utilizatsiya yig‘imi xarajatlariga davlat budjetidan mablag‘ ajratish uchun Iqtisodiy taraqqiyot va kambag‘allikni qisqartirish vazirligi 224,5 mlrd so‘m ajratish ko‘zda tutilgan.Iqtisodchi Otabek Bakirov so'zlariga ko‘ra, UzAuto Motors eksport qiladigan avtomobillar uchun utilizatsiya xarajatlariga davlat budjeti hisobidan qo‘shimcha 225 mlrd so‘mgacha subsidiya ajratilmoqda. 2022-yil budjeti tasdiqlanganida bu summa 100 mlrd so‘m edi.
“Yil boshida tasdiqlangan budjetda xorijga eksport qilingan avtomobillar uchun utilizatsiya yig‘imini qoplashga 100 mlrd subsidiya bir dumalab yil oxirida 325 mlrd so‘mga yetibdi. Bu siz o‘z yoningizdan qozog‘istonlik va rossiyalik xaridorlar sotib olayotgan avtomobillar uchun ham utilizatsiya yig‘imini to‘layapsiz degani”, — deb yozadi Bakirov.
Izoh (0)