Россиянинг Украинага ҳужумида ракеталар базаси тугаса қандай йўл тутилади?
Россияда Украинага яна 3—4 марта ёппасига ҳужум қилиш учун етарли ракеталар қолди. Бу ҳақда Украина Миллий хавфсизлик ва мудофаа кенгаши котиби Алексей Данилов маълум қилди.
Унинг айтишича, Россия ракеталарни қўллаш меъёридан аллақачон ўтиб бўлган. Бироқ ракеталардан бундай фойдаланиш Россия қўшинлари учун номақбулдир.«У ҳолда улар бутунлай ракетасиз қолади, бу эса номақбул ҳолат, ахир уларда умуман бошқача вазиятлар юзага келиши мумкин, шу сабабли улар қандайдир захира қолдириши керак. Бироқ уларда С-300 ракеталари бор, уларни, афсуски, бизнинг шаҳарларимизга қарши ишлатишяпти», — деган Данилов.
Унинг қўшимча қилишича, Эрондан баллистик ракеталар етказиб берилиши хавфи ҳам мавжуд.
Аввалроқ Украина Мудофаа вазирлиги разведка бош бошқармаси вакили Андрей Юсов Россия Эрондан Shahed-136 камикадзе дронларининг янги партиясини олганини маълум қилган эди.
Аммо дронларнинг навбатдаги партияси аввалгиларига қараганда камроқ бўлгани боис россияликлар энди бу дронлардан авайлаб фойдаланмоқда.
Туркманистондан Озарбайжонга газ қувури қуриладими ёки йўқ?
Туркманистонда 14 декабрь куни ўтказилган Туркманистон, Туркия ва Озарбайжон раҳбарлари саммитида туркман газини Озарбайжон ва Туркия орқали Европа бозорига транзит қилиш масаласи асосий мавзу бўлган эди.
«Хроника Туркменистана» нашри Туркия президентининг қуйидаги фикрларини келтиради:
«Бутун дунё, айниқса Европа учун энергия хавфсизлиги янада муҳим. Бу борада Боку–Тбилиси–Жайҳон нефть қувури ва Жанубий газ коридори алоҳида ажралиб туради. Биз бу йўлак орқали Каспий газини Европага етказамиз. Энди Туркманистон табиий газини худди шундай тарзда Ғарб бозорларига узатиш устида иш бошлашимиз керак», — деганди Эрдўғон.
Middle East Eye нашри ёзишича Туркия раҳабрининг нутқида томонлар янги газ қувури қуриш имкониятини ўрганаётгани ҳақида тўғридан-тўғри айтилади.Бироқ Туркмен news қайд этишича, 16 декабрь куни россиялик сенатор Александр Башкин «Астраханские Новости» нашрига изоҳ бериб, Россия Каспий орқали газ қувури қурилишига розилик бермаслигини айтган.«Европада Туркманистондан Бокуга транскаспий газ қувурини қуриш, у ердан эса Туркия орқали Европага ташиш истиқболлари яна муҳокама қилина бошлади.Шуни билиш керакки, бешта Каспийбўйи давлатлар томонидан имзоланган Каспийнинг мақоми бўйича ҳужжатга мувофиқ, экологик хавфсизлик соҳасига таъсир қиладиган лойиҳаларни амалга ошириш учун Каспий бешлигининг барча давлатлари розилик бериши керак. Газ қувурининг сув остидан ўтадиган қисми Каспий денгизи экологик хавфсизлигига таҳдид солиши мумкинлигини ҳисобга олиб, Россия уни қуришга розилик бера олмайди», — деди Башкин.Туркманистон томонига эса сенатор «бизга дўст бўлган ушбу мамлакатда қазиб олинаётган ҳар қандай ҳажмдаги газни Хитой, Ҳиндистон ва Россия тўлиқ ҳажмда қабул қилишга қодир», — дея вазиятни изоҳлаган.
Марказий Осиё давлатларидаги фуқаролар энди Россияга эмас Японияга ишлагани борадими?
Япония ҳукумати чет эл фуқароларига қўл меҳнати билан боғлиқ ишларни бажаришга имкон берувчи «махсус малакали ишчилар дастури» орқали Марказий Осиё давлатларидан кўпроқ хорижий ишчи кучини олиб келишни режалаштирмоқда. Бу ҳақда The Japan News хабар берди.
Япония ташқи ишлар вазири Ёшимаса Хаяши 24 декабрь куни Токиода Япония ва Марказий Осиёнинг бешта давлати ташқи ишлар вазирлари ўртасидаги учрашувда бу режа ҳақида маълум қилиши кутилмоқда.
Хаяши Япониянинг «одамларга сармоя киритиш» ва «ўсиш сифати»га урғу бериб, Марказий Осиёнинг барқарор ривожланишига ҳисса қўшишини қайд этади.Япония 2019 йилда Ўзбекистон билан инсон ресурсларини қабул қилиш бўйича ҳамкорлик меморандумини имзолаган.
Марказий осиёлик меҳнат муҳожирларининг аксарияти Россияда ишлайди. Япония ташқи ишлар вазирлигининг юқори мартабали расмийси айтишича, бу давлатлардан кўпроқ чет эллик ишчиларни қабул қилиш ва «ишчиларга малакасини ошириб, ундан ўз ватанида фойдаланишга рухсат бериш» орқали Россияга қарамликни камайтириш мумкин.
Марказий Осиё жуда кўп табиий ресурсларга, жумладан нефтга эга, аммо экспорт асосан қўшни Хитой ва Россия билан чегараланган. 17 декабрь кунги йиғилишда Хаяши, шунингдек, Япония Марказий Осиёнинг беш давлатига экспорт бозорларини диверсификация қилишда ёрдам беришини ва декарбонизация технологияларини ишлаб чиқишда ҳамкорлик қилишини маълум қилган.
Ўзбекистон давлат бюджетига ўзгартиришлар киритиш масаласи. Автомобиль саноатидаги ўзгараётган рақамлар
Ўзбекистонда 2022 йил давлат бюджетига ўзгартириш тўғрисида масала кўриб чиқилмоқда. Бу ҳақда депутат Расул Кушербаев Telegram саҳифасида хабар бермоқда.
Депутатлар қўлига шошилинч берилган Вазирлар Маҳкамаси томонидан киритилган қонун лойиҳаси кўра, 2022 йил бюджетидан экспорт қилинадиган мамлакатларда маҳаллий автомобиль саноати корхоналари томонидан тўланадиган утилизация йиғими харажатларига давлат бюджетидан маблағ ажратиш учун Иқтисодий тараққиёт ва камбағалликни қисқартириш вазирлиги 224,5 млрд сўм ажратиш кўзда тутилган.Иқтисодчи Отабек Бакиров сўзларига кўра, UzAuto Motors экспорт қиладиган автомобиллар учун утилизация харажатларига давлат бюджети ҳисобидан қўшимча 225 млрд сўмгача субсидия ажратилмоқда. 2022 йил бюджети тасдиқланганида бу сумма 100 млрд сўм эди.
«Йил бошида тасдиқланган бюджетда хорижга экспорт қилинган автомобиллар учун утилизация йиғимини қоплашга 100 млрд субсидия бир думалаб йил охирида 325 млрд сўмга етибди. Бу сиз ўз ёнингиздан қозоғистонлик ва россиялик харидорлар сотиб олаётган автомобиллар учун ҳам утилизация йиғимини тўлаяпсиз дегани», — деб ёзади Бакиров.
Изоҳ (0)