Eronda mamlakatdagi eng mashhur aktrisalardan biri Tarane Alido‘stiy namoyishchilarni qo‘llab-quvvatlagani uchun hibsga olindi. Bu haqda G‘arb OAVlari Eron axborot agentliklariga tayanib xabar bermoqda.
Alido‘stiy 23 yoshli namoyishchi Mohsen Shekariyning qatl etilishi haqidagi Instagram postidan bir necha kun o‘tib hibsga olingan. Postda aktrisa xalqaro tashkilotlarni Eron rasmiylarining harakatlariga javob bermayotgani uchun tanqid qilgan.
Eron agentliklariga ko‘ra, hibsga olinishiga aktrisaning “tartibsizliklarni qo‘zg‘atuvchi yolg‘on va buzg‘unchi xabarlarni” nashr etgani va rasmiylarga “o‘z da’volarini tasdiqlovchi hujjatlarni” taqdim etmagani sabab bo‘lgan, deb yozadi The Guardian.
Alido‘stiyning sakkiz milliondan ortiq obunachi bor Instagram akkaunti hozirda bloklangan. Noyabr oyida aktrisa u yerda ro‘molsiz tushgan suratini joylagandi; Post milliondan ortiq layk olgan.
38 yoshli Tarane Alido‘stiy Erondan tashqarida, jumladan, “Savdogar” filmidagi roli bilan tanilgan. Film 2017-yilda chet tilidagi eng yaxshi film sifatida “Oskar” olgan. 2020-yilda aktrisa Twitter’da politsiyani tanqid qilgani uchun besh oylik shartli qamoq jazosiga hukm qilingan.
Bu eronlik taniqli shaxslarning namoyishchilarni qo‘llab-quvvatlagani uchun birinchi marta hibsga olinishi emas. Noyabr oyida aktrisalar Xengame Gaziane va Katayun Riyaxi ham hibsga olingandi; keyin ular ozod qilindi.
Huquq faollarining hisob-kitoblariga ko‘ra, Erondagi namoyishlar chog‘ida 18 mingdan ortiq odam hibsga olingan. Inson huquqlari tashkilotlari ma’lumotlariga ko‘ra, xavfsizlik kuchlari tomonidan 450 dan ortiq odam o‘ldirilgan.
Izoh (0)