Эронда мамлакатдаги энг машҳур актрисалардан бири Таране Алидўстий намойишчиларни қўллаб-қувватлагани учун ҳибсга олинди. Бу ҳақда Ғарб ОАВлари Эрон ахборот агентликларига таяниб хабар бермоқда.
Алидўстий 23 ёшли намойишчи Моҳсен Шекарийнинг қатл этилиши ҳақидаги Instagram постидан бир неча кун ўтиб ҳибсга олинган. Постда актриса халқаро ташкилотларни Эрон расмийларининг ҳаракатларига жавоб бермаётгани учун танқид қилган.
Эрон агентликларига кўра, ҳибсга олинишига актрисанинг «тартибсизликларни қўзғатувчи ёлғон ва бузғунчи хабарларни» нашр этгани ва расмийларга «ўз даъволарини тасдиқловчи ҳужжатларни» тақдим этмагани сабаб бўлган, деб ёзади The Guardian.
Алидўстийнинг саккиз миллиондан ортиқ обуначи бор Instagram аккаунти ҳозирда блокланган. Ноябрь ойида актриса у ерда рўмолсиз тушган суратини жойлаганди; Пост миллиондан ортиқ лайк олган.
38 ёшли Таране Алидўстий Эрондан ташқарида, жумладан, «Савдогар» фильмидаги роли билан танилган. Фильм 2017 йилда чет тилидаги энг яхши фильм сифатида «Оскар» олган. 2020 йилда актриса Twitter’да полицияни танқид қилгани учун беш ойлик шартли қамоқ жазосига ҳукм қилинган.
Бу эронлик таниқли шахсларнинг намойишчиларни қўллаб-қувватлагани учун биринчи марта ҳибсга олиниши эмас. Ноябрь ойида актрисалар Хенгаме Газиане ва Катаюн Рияхи ҳам ҳибсга олинганди; кейин улар озод қилинди.
Ҳуқуқ фаолларининг ҳисоб-китобларига кўра, Эрондаги намойишлар чоғида 18 мингдан ортиқ одам ҳибсга олинган. Инсон ҳуқуқлари ташкилотлари маълумотларига кўра, хавфсизлик кучлари томонидан 450 дан ортиқ одам ўлдирилган.
Изоҳ (0)