Disney malikalarini ko‘pincha bolalar tarbiyasiga yomon ta’sir qilishda ayblashadi: ular gender stereotiplarini qo‘llab-quvvatlaydi, qizning beli qanday bo‘lishi kerakligi haqida noto‘g‘ri fikrlar beradi va hokazo. Ammo multfilmdagi ba’zi narsalar chindan ham real hayotga to‘g‘ri kelmaydi.
Elza
“Muzyurak” multfilmida malika Elza — bo‘lajak taxt vorisi — sehrli kuchga ega, lekin uni qanday boshqarishni bilmaydi. Ba’zi sabablarga ko‘ra, uning ota-onasi unga kuchini boshqarishni o‘rgatish yoki hech bo‘lmaganda buning uchun jodugarni taklif qilish o‘rniga uni butun dunyodan ajratishga qaror qilishadi.
Natijada toj kiyish paytida Elza na sehrni, na o‘z his-tuyg‘ularini nazorat qila olmaydigan qiz bo‘lib qoladi — yosh malika o‘z mamlakatini muzlatib qo‘yadi va tog‘larga qochib ketadi. Eng qizig‘i shu yerdan boshlanadi: u darhol muzdan ulkan qasr quradi, bahaybat qo‘riqchilar yaratadi va hatto libosini o‘zgartiradi. U bularni qayerdan o‘rgangan? Agar Elzaning sehri faqat qor va muzga taalluqli bo‘lsa, uning libosi nimadan tikilgan?
Rapunzel
Ehtimol, Rapunzel eng sirli malika bo‘lsa kerak. U butun umrini minoraga qamalib o‘tkazadi, shuning uchun ham qizning uyda yalangoyoq yurgani mantiqan to‘g‘ri. Biroq Rapunzel yalangoyoq holda ko‘chada ham shunday tez yuguradi, o‘tkir tosh yoki yiqilishi mumkinligiga parvo ham qilmaydi. Aftidan, qiz hayratlanarli darajada omadli yoki og‘riqqa juda chidamli bo‘lsa kerak.
Rapunzelning yana bir g‘alati jihati — uning sochlari. Yoyilgan holda uning uzunligi 20 metrdan oshadi, ammo yig‘ilganda hatto yerga ham tegmaydi. Qizning bo‘yi taxminan 164 sm bo‘lishiga qaramay, o‘rilgan sochlarining uzunligi 1,5 m dan biroz oshadi, xolos.
Tiana
Tiana Navinni o‘padi va qurbaqaga aylanib qoladi. Ammo uning dugonasi Sharlotta sehrlangan shahzodani bir necha marta o‘padi, lekin negadir qurbaqaga aylanmaydi.
Bell
Bell ham barcha Disney malikalari singari juda nozik qiz. Uning hech qanday sehrli qudrati yo‘q. Ammo u bo‘rilar bilan jangda yaralangan ulkan maxluqni ko‘tarib, otga mindiradi. Darvoqe, ot ham shunday og‘irlikni ko‘tara olgani bilan tomoshabinni hayratga soladi.
Zolushka
Ertakda aytilishicha, Zolushka uy ishlarining barchasini o‘z zimmasiga olgan kambag‘al qiz. Ammo multfilmda u deyarli ish qilmaydi: sichqonlar va qushlar uning uchun hammasini qiladi. Aytgancha, ular shahzoda bilan uchrashish uchun Zolushkaga ombordan qochishga ham yordam berishadi. Qasrdagi balga qizni tayyorlash ham parining zimmasiga tushadi. Zolushkaning o‘zi esa baxtga erishish uchun faqat billur tuflisini yo‘qotadi, xolos.
Ariel
Multfilmda kichkina suv parisi Ariel o‘z ovozini yurish qobiliyatiga almashtiradi. Shuning uchun u shahzodaga uni qutqargan o‘zi ekanligini aytolmaydi. Lekin nega u bu haqda yozib bermasligi kerak? Malika, albatta, savodxon, chunki u jodugar Ursula taklif qilgan shartnomani o‘qib, imzolagan.
Pokahontas
Hindular qabilasi oqsoqolining qizi ingliz tilini bilmasdi. Biroq u buvisiga tegishli bo‘lgan va unga maslahat bergan ichki ovozni eshitadi: “Qalbing bilan tingla”. Shundan keyin hech qanday muammosiz Jon Smitni tushuna boshlaydi.
Merida
Merida kuchli va mustaqil malikalardan biri. U turmushga chiqishni istamaydi, ot minadi va kamondan otadi, qiz hamma ishlarni erkaklarsiz ham uddasidan chiqadi, degan ishonchni ta’kidlaydi. Albatta, qiz ota-onasi uni turmushga chiqishga majburlayotganidan g‘azablanadi, lekin o‘z onasini jodugarning sehri bilan zaharlash qandaydir g‘alati.
Mavzuga doir:
Izoh (0)