DXR rasmiylari Chexiya Ukraina armiyasi uchun dronlar ishlab chiqarmoqchiligini da’vo qilmoqda

Chexiyada Ukraina Qurolli kuchlari uchun dronlar ishlab chiqarishni yo‘lga qo‘yish rejalashtirilmoqda, dedi Donetsk xalq respublikasi rahbari vazifasini bajaruvchi Denis Pushilinning maslahatchisi Igor Kimakovskiy “RIA Novosti”ga.

“Ular hozir Chexiya respublikasida, jumladan, Ukraina dronlarini ishlab chiqarishni yo‘lga qo‘yish harakatida. Ya’ni, ular Ukraina hududi biznikilar tomonidan o‘qqa tutilishini tushunadi, hozir u yerda dronlar ishlab chiqarishni yo‘lga qo‘yib, ukrainaliklarni bevosita Chexiyada yollamoqda”, — dedi Kimakovskiy.

Pushilinning maslahatchisi ta’kidlaganidek, Ukraina hududidagi energetika muammolarini inobatga olgan holda, hozircha u yerda biror qurol ishlab chiqarish uskunalarini joylashtirish imkonsiz. Shu bilan birga, uning qo‘shimcha qilishicha, agar bunga urinishlar bo‘lsa, bu obyektlar Rossiya zarbalari nishoniga aylanadi.

10-oktabrdan beri Rossiya Ukrainadagi energetika infratuzilmasi obyektlariga hujum qilmoqda. Butun Ukraina bo‘ylab zarbalardan so‘ng elektr, issiqlik va suv ta’minotida muammolar yuzaga keldi. Noyabr oyi oxirida “Ukrenergo” mamlakatda buzilmagan yirik GES va issiqlik elektr stansiyalari qolmaganini ma’lum qildi.

Ukraina prezidenti Vladimir Zelenskiy G‘arb davlatlarini qurol-yarog‘, jumladan, zamonaviy havo hujumidan mudofaa tizimlari yetkazib berishni ko‘paytirishga chaqirdi. Ukraina Qurolli kuchlari avvalroq Ukraina havo hujumidan mudofaa tizimlari ballistik raketalarni urib tushira olmasligini ta’kidlagan edi. Moskva Kiyevga qurol yetkazib berilishini bir necha bor tanqid qilgan.