Rossiya prezidenti Vladimir Putin 19-dekabr kuni ishchi tashrif bilan Minskka borib, Belarus prezidenti Aleksandr Lukashenko bilan muzokaralar o‘tkazadi. Bu haqda Belarus rahbari matbuot xizmati xabar bermoqda.
Belarus-Rossiya muzokaralari Mustaqillik saroyida bo‘lib o‘tadi. Uchrashuv keng tartibdagi suhbat bilan boshlanadi, unda davlat rahbarlaridan tashqari, ikki mamlakat hukumatlari, vazirliklar va idoralar rahbarlari qatnashadi. Shundan keyin prezidentlar yuzma-yuz formatda muzokaralarni davom ettiradi, so‘ng bayonot e’lon qilib, jurnalistlar savollariga javob beradi.
Davlat rahbarlari avvalroq qabul qilingan ittifoq dasturlarining amalga oshirilishi qanday borayotgani, birinchi navbatda, savdo-iqtisodiy hamkorlik, import o‘rnini bosishga urg‘u qaratilgan qo‘shma kooperatsion loyihalar masalalari ko‘rib chiqiladi. Shuningdek, prezidentlar mintaqa va dunyodagi vaziyat yuzasidan fikr almashadi, energetika sohasi, xavfsizlik masalalari va tahdidlarga javob ko‘rsatish bo‘yicha qo‘shma choralar borasidagi hamkorlik haqida gaplashadi.
Kreml hozircha Putinning Minskka tashrifi haqida xabar bergani yo‘q. Rossiya va Belarus rahbarlarining dekabrdagi uchrashuvi ehtimoli haqida avvalroq Rossiya prezidenti matbuot kotibi Dmitriy Peskov ma’lum qilgandi.
Lukashenko esa Putin bilan uchrashmoqchi ekanini noyabr oxiridayoq e’lon qilgandi. U iqtisodiyotdagi muammolar va ikki tomonlama hamkorlikni to‘xtatib qo‘yayotgan byurokratik masalalarni muhokama qilishini aytgandi.
Oxirgi marta Rossiya va Belarus prezidentlari 26-sentabr kuni Sochida uchrashgandi. Ular iqtisodiy masalalarni, Ittifoq davlatini hamda “kimyo, oziq-ovqat, o‘g‘itlar sohasidagi” qo‘shma rejalarni muhokama qilgandi.
Putin Minskka bundan oldin 2019-yilda kelgan, o‘shanda u Ikkinchi Yevropa o‘yinlari musobaqalarini tomosha qilgan va shu jumladan, Lukashenko bilan ham uchrashgandi.
Rossiya va Belarus Ittifoq davlati 2000-yil yanvaridan buyon mavjud bo‘lib kelmoqda. Ittifoq ishtirokchilari umumiy parlament va konstitutsiya, yagona valyuta yaratishni muhokama qilgan, ammo bunday bitimni qabul qilmagan. 2019-yilda Rossiya tashabbusi bilan muzokaralar qayta boshlandi, 2021-yilda esa tomonlar Rossiya va Belarusning integratsiyalashuviga qaratilgan 28 ta ittifoq dasturlarni kelishib oldi.
Izoh (0)