AQSH prezidenti ma’muriyati Rossiyani Birlashgan Millatlar Tashkiloti Xavfsizlik kengashidan chiqarib tashlash kerak, deb hisoblaydi, ammo tashkilot qoidalari bunga yo‘l qo‘ymaydi, dedi Oq uy matbuot kotibi Karin Jan-Pyer.
“Rossiyaning Ukrainadagi harakatlari BMT Nizomini buzish va Xavfsizlik Kengashi mandatini haqorat qilishdir. Biz Xavfsizlik Kengashining doimiy a’zosi tashkilot nizomini buzayotgani va Ukrainada bunday shafqatsiz urush olib borayotganidan, xususan, Rossiya insonlar azob-qubatini oshirish maqsadida mamlakatning muhim infratuzilmasini yo‘q qilishga intilayotganidan g‘azabdamiz. Agar Rossiyani BMT Xavfsizlik Kengashidan chiqarib tashlashning biror usuli bo‘lsa, biz bunga darhol kirishardik”, — dedi matbuot kotibi jurnalistlar uchun brifingda.
Karine Jan-Pyerning so‘zlariga ko‘ra, BMT qoidalari Rossiyani Xavfsizlik Kengashidan chetlashtirishga yo‘l qo‘ymasligi bois, AQSH barcha xalqaro platformalarda uni yakkalashga, shuningdek, sanksiyalar va majburlov choralari yordamida javobgarlikka tortishga urinishda davom etadi.
“Rossiya — tajovuzkor davlat. Buni unutmasligimiz kerak. Bu urushni aynan Rossiya boshlagan”, — deya xulosa qildi matbuot kotibi. Uning qo‘shimcha qilishicha, AQSH Rossiya bilan urushmagan va hozir ham urushayotgani yo‘q, faqat AQSH prezidenti Jo Bayden bir yil avval Rossiya prezidenti Vladimir Putinga bergan va’dasini bajarmoqda: u agar Rossiya Ukrainaga hujum qilsa, AQSH ukrainaliklarga o‘zini himoya qilishga yordam berishini aytgandi.
“Qo‘shma Shtatlar Ukrainani qancha kerak bo‘lsa, shuncha vaqt qo‘llab-quvvatlaydi”, — dedi Jan-Pyer.
Rossiya Tashqi ishlar vazirligining rasmiy vakili Mariya Zaxarova Oq uy matbuot kotibining so‘zlariga izoh berar ekan, o‘zining Telegram-kanalida “Agar Rossiyani yo‘q qilishning yo‘li bo‘lsa, ular darhol buni amalga oshirishga kirishardi”, deb yozdi.
14-dekabr kuni AQSH Vakillar palatasining ikki a’zosi Stiv Koen va Jo Uilson AQSH prezidentini Rossiyani BMT Xavfsizlik Kengashidan chiqarib tashlash jarayonini boshlashga chaqiruvchi rezolyutsiyani taqdim etdi. Hujjat mualliflarining ta’kidlashicha, Rossiya BMT Nizomini “qo‘pol ravishda buzdi”, jumladan, Ukraina hududlarini noqonuniy anneksiya qilib, tinch aholiga qarshi jinoyatlar va yadroviy tahdidlarga yo‘l qo‘ydi, bu esa, o‘z navbatida, Rossiyaning Xavfsizlik Kengashidagi doimiy a’zolik huquqini shubha ostiga qo‘yadi.
2022-yilning aprel oyida BMT Bosh Assambleyasi Rossiyani Inson huquqlari bo‘yicha kengash tarkibidan chiqarish uchun ovoz bergandi. Ovoz berish Buchada tinch aholi o‘ldirilgani ma’lum bo‘lganidan keyin AQSH va Buyuk Britaniya tashabbusi bilan boshlangan. O‘z navbatida, Rossiya kengashdagi vakolatlarini muddatidan oldin tugatayotganini e’lon qildi, shuningdek, Bosh Assambleya rezolyutsiyasini “noqonuniy va siyosiy motivli qadam” deb atadi.
Izoh (0)