ДХР расмийлари Чехия Украина армияси учун дронлар ишлаб чиқармоқчилигини даъво қилмоқда

Чехияда Украина Қуролли кучлари учун дронлар ишлаб чиқаришни йўлга қўйиш режалаштирилмоқда, деди Донецк халқ республикаси раҳбари вазифасини бажарувчи Денис Пушилиннинг маслаҳатчиси Игорь Кимаковский «РИА Новости»га.

«Улар ҳозир Чехия республикасида, жумладан, Украина дронларини ишлаб чиқаришни йўлга қўйиш ҳаракатида. Яъни, улар Украина ҳудуди бизникилар томонидан ўққа тутилишини тушунади, ҳозир у ерда дронлар ишлаб чиқаришни йўлга қўйиб, украиналикларни бевосита Чехияда ёлламоқда», — деди Кимаковский.

Пушилиннинг маслаҳатчиси таъкидлаганидек, Украина ҳудудидаги энергетика муаммоларини инобатга олган ҳолда, ҳозирча у ерда бирор қурол ишлаб чиқариш ускуналарини жойлаштириш имконсиз. Шу билан бирга, унинг қўшимча қилишича, агар бунга уринишлар бўлса, бу объектлар Россия зарбалари нишонига айланади.

10 октябрдан бери Россия Украинадаги энергетика инфратузилмаси объектларига ҳужум қилмоқда. Бутун Украина бўйлаб зарбалардан сўнг электр, иссиқлик ва сув таъминотида муаммолар юзага келди. Ноябрь ойи охирида «Укрэнерго» мамлакатда бузилмаган йирик ГЭС ва иссиқлик электр станциялари қолмаганини маълум қилди.

Украина президенти Владимир Зеленский Ғарб давлатларини қурол-яроғ, жумладан, замонавий ҳаво ҳужумидан мудофаа тизимлари етказиб беришни кўпайтиришга чақирди. Украина Қуролли кучлари аввалроқ Украина ҳаво ҳужумидан мудофаа тизимлари баллистик ракеталарни уриб тушира олмаслигини таъкидлаган эди. Москва Киевга қурол етказиб берилишини бир неча бор танқид қилган.